قايرات نۇرتاستىڭ اكەسى وتباسىن اسىراۋ ءۇشىن دارەتحانا جۋعان كەزدەرىن ەسكە الدى
قايرات نۇرتاستىڭ اكەسى وتباسىن اسىراۋ ءۇشىن جاتاقحانا دارەتحاناسىن جۋعان كۇندەرىن ەسكە الدى. دەگەنمەن، العاشقىدا تالاي قيىندىقتى باستان كەشكەن ايداربەكوۆتەر كوپ ۇزاماي ەڭ باي ستۋدەنتتەر قاتارىنا قوسىلعان كورىنەدى. وعان ءبىر سەبەپ دۇنيەگە كەلگەن قايراتىمنىڭ نەسىبەسى مول بولدى، دەيدى اناسى.
بۇل تۋرالى «ەۋرازيا» ارناسىنىڭ «قالاۋلىم» باعدارلاماسىندا ايتىلدى، دەپ جازادى Stan.kz.
«ءبىز ۇيلەنگەن سوڭ جاتاقحانادا تۇردىق. بالاڭ بولعاننان كەيىن سونىڭ بولاشاعىن ويلايسىڭ عوي. سول جاقسى ءىشىپ- جەسە، كيىنسە دەگەن سياقتى. سول كەزدە ۆيدەو دەيدى عوي، جاتاقحانانىڭ ارتىندا ۇلكەن اكت زالىن الىپ، سول جەردە نۇرتاس كينو كورسەتتى، مەن ءوزىم ساۋداعا شىعۋعا بەل بۋدىم. ويتكەنى ول كەزدە ساۋدانىڭ ناعىز قايناپ جاتقان كەزى بولاتىن. ءبىر ايلىققا، بىرەۋگە تاۋەلدى بولىپ جۇمىس جاساعىم كەلمەدى. وتباسىمنان العان تاربيەم سولاي. ەشكىم بەتىمە كەلمەيتىن، وتباسىمدا جەتىنشىمىن.
نانعا اقشا بولماعان كەز جوق. ەندى قايراتقا دەيىن شاكىرتاقى كەزىندە بولعان شىعار. ۇنەمدەپ قويىپ، تاماققا، كينوعا ۇنەمدەپ قوياتىنمىن. ءبىراق قايرات نەسىبەسى وتە زور بالا بولدى. ويتكەنى قايرات ومىرگە كەلگەننەن كەيىن ەكەۋمىزدىڭ تابىسىمىز وتە جوعارى بولىپ، ستۋدەنتتەر اراسىندا ەڭ العاش كولىك، ءۇي الدىق. ۇيىمىزدەن اتتاپ شىققالى اقشا سۇراعان ەمەسپىز. قالعان بالا- شاعانىڭ نەسىبەسىن ءبىز جەپ قوياتىن سياقتى... ءوزىڭ تاپقان دۇنيەڭ ءبىر قاسىق الساڭ دا وتە ءدامدى بولادى. كەيدە ارتىق سويلەپ قويساق ءبىر- بىرىمىزگە: «ەسكى شالباردى ءىلىپ قويايىقشى»، - دەپ ايتامىز. ءبىر كەزدەرى ەسىنە سالىپ تۇرسىن دەپ شاپان ءىلىپ قويعان عوي»، - دەيدى گۇلزيرا ايداربەكوۆا اعىنان جارىلىپ.
«مەن پوليتەحتا وقىدىم. قايرات دۇنيەگە كەلگەن سوڭ، بۇل كىسى سونىمەن وتىرادى. مەن ستۋدەنتپىن، اسكەردەن كەيىن وقۋعا تۇسكەم. ءبىلىمىم وتە تومەن، ستيپەنديا المايمىن. اۋىلدان كەلەتىن اقشانىڭ رەتى جوق. اكە- شەشەمىز قايتىپ كەتكەن ول كەزدە، باسقالارىنىڭ ءوز وتباسى بار. ءبىزدىڭ پوليتەحتىڭ جاتاقحاناسىندا كىلەڭ جىگىتتەر، قىزدار از وقيتىن. پاتەرگە 25 سوم تولەيمىز، ول اقشا ويدا- قىردا جوق. سونىمەن دەكاناتقا باردىم، ماعان بولمە بەرىڭىز دەپ. سويتسەم: «ساعان كىم ۇيلەن دەدى، بىزدە وتباسىلىق جاتاقحانا جوق» ، - دەدى. دەكاناتتان شىقپاي قويدىم. ولار ماعان: «قاي قاباتتا بوس بولمە بولادى، سول قاباتتىڭ ەدەن جۋۋشىسى بولاسىڭ» ، - دەپ شارت قويدى. سونىمەن تاڭەرتەڭ 6 دا تۇرامىن، ستۋدەنتتەر ۇيقىلارىنان تۇرامىز دەگەنشە ءدالىزدى جۋىپ شىعامىن. ول كەزدە لامينات جوق، لينولەۋم بولاتىن. ەكى باسىندا ەرلەر جانە ايەلدەر دارەتحاناسى. قولىما قولعاپتى كيىپ، شلانگىنى الىپ اجەتحانا تازالايتىنمىن. جىگىتتەردىڭ اجەتحاناسى تازا بولادى، قىزداردىكى وتە ناشار. ساعات 7 دە ستۋدەنتتەر ۇيقىلارىنان تۇرىپ جاتقاندا، مەن ءشايىمدى ءىشىپ، ساباققا كەتىپ قالاتىنمىن» ، - دەپ ەسكە الدى نۇرتاس ايداربەكوۆ.
