عالىمدار كۇيزەلىستەن قۇتىلۋدىڭ ەڭ وڭاي جولىن تاپتى

كۇيزەلىستەن شىعۋ جولدارىن زەرتتەگەن عالىمدار وسىنداي قورىتىندىعا كەلىپ وتىر، دەپ حابارلايدى Baq.kz اقپارات اگەنتتىگى ريا نوۆوستي- گە سىلتەمە جاساپ.

«جاتتىعۋدىڭ دەپرەسسياعا قارسى كۇرەستە پايداسى بارىن بۇرىننان بىلەتىن ەدىك، الايدا ونىڭ كۇيزەلىستەن شىعۋعا قاتتى كومەكتەسەتىنىن العاش رەت دالەلدەپ وتىرمىز» ، - دەيدى سيدنەيدەگى جاڭا وڭتۇستىك ۋەلس ۋنيۆەرسيتەتىنىڭ قىزمەتكەرى سەميۋەل حارۆي.

سوزىلمالى دەپرەسسيا ەڭ كوپ تارالعان جانە ەڭ كۇردەلى پسيحيكالىق اۋىتقۋشىلىق سانالادى. ادەتتە، ۇزاق ۋاقىت كۇيزەلىستە جۇرگەن ادامداردىڭ ومىرگە قىزۋشىلىعى جوعالىپ، ەنجارلىق باسادى، ءوز- وزىنە كوڭىلى تولمايدى. دەپرەسسيامەن كۇرەسۋ ءۇشىن عالىمدار جۇزدەگەن ءدارى جاساپ شىعاردى، ءبىراق كوبىسىنىڭ جاناما اسەرى بار. ولار زات الماسۋدىڭ بۇزىلۋى، سەمىزدىك، ءدارى ىشۋگە ادەتتەنىپ الۋ جانە تاعىسىن تاعى.

سوڭعى جىلدارداعى زەرتتەۋلەر كورسەتكەندەي، ۇنەمى كۇيزەلىستە ءجۇرۋ ادامنىڭ پسيحيكاسى مەن مىنەز- قۇلقىنا عانا ەمەس، ونىڭ دەنساۋلىعىنا دا كەرى اسەرىن تيگىزەدى. اتاپ ايتقاندا، دەپرەسسيا ادامنىڭ ءومىر ءسۇرۋ ۇزاقتىعىن قىسقارتادى. ماسەلەن، ءتورت جىل بۇرىن نيدەرلاند بيولوگتارى دەپرەسسيادان تەلومەرلەردىڭ (حروموسومانىڭ ۇش جاعىنداعى بولىگى، قورعانىس قىزمەتىن اتقارادى) ۇزىندىعى ەداۋىر قىسقارعانىن بايقاعان. ناتيجەسىندە كلەتكالار جىلدام قارتايا باستاپتى.

حارۆي مەن ونىڭ ارىپتەستەرى نورۆەگيا تۇرعىندارىنىڭ دەنساۋلىعىن باقىلاۋ ناتيجەلەرىن سارالاپ، كۇيزەلىستەن ارىلۋدىڭ ءقاۋىپسىز ءارى قاراپايىم جولىن تاپتى. جوبا 1980-1990 -جىلدار ارالىعىندا نورۆەگياداعى ءبىر گۋبەرنيادا جۇزەگە اسقان. جوباعا شامامەن 30 مىڭ ەرەسەك نورۆەگيالىق قاتىسىپتى. عالىمدار 24 ساعات بويى ولاردىڭ دەنساۋلىعىن عانا ەمەس، كوڭىل- كۇيىن دە باقىلاپ وتىرعان.

وسىلايشا، جاتتىعۋ جاسامايتىن ادامدار اپتاسىنا ءبىر- ەكى ساعاتىن سپورتقا بولەتىن نورۆەگيالىقتارعا قاراعاندا دەپرەسسياعا% 44 ءجيى ۇشىرايتىنى انىقتالدى.

«ازىرگە مۇنىڭ نەمەن بايلانىستى ەكەنى تۇسىنىكسىز. ءبىراق، ءبىزدىڭ ويىمىزشا، جاتتىعۋدىڭ بيولوگيالىق قانا ەمەس، الەۋمەتتىك پايداسى دا بار. سوندىقتان كۇيزەلىستە جۇرگەندەردىڭ ءبىر مەزگىل جاتتىعۋ جاساعانى ابزال» ، - دەيدى حارۆي.