پاۆلوداردا شەنەۋنىك ورالمانداردى جالعان قۇجاتپەن الداعان
ەكىباستۇز قالاسىنىڭ تۇرعىن ءۇي-كوممۋنالدىق شارۋاشىلىعى، جولاۋشىلار تاسىمالى جانە اۆتوموبيل جولدارى ءبولىمىنىڭ مامانى عابدوللا شورمانوۆ التى جىل بويى تاريحي وتانى - قازاقستانعا ورالعاندارعا زاڭسىز جەر قۇجاتتارىن ۇسىنۋمەن اينالىسىپ كەلگەن.
بۇل تۋرالى بۇگىن وتكەن بريفينگتە پاۆلودار وبلىسى بويىنشا سىبايلاس جەمقورلىققا قارسى ءىس-قيمىل جونىندەگى ۇلتتىق بيۋرو دەپارتامەنتىنىڭ تەرگەۋ باسقارماسىنىڭ باسشىسى رۋسلان قۋاتوۆ ءمالىم ەتتى.
«ول ءوزىنىڭ ءۇي كومپيۋتەرىندە اكىمدىكتىڭ لاۋازىمدى تۇلعالارىنىڭ قولتاڭبالارىنىڭ كوشىرمەسىن جاساپ، ولاردى بەلگىلى قۇجاتتارعا قويعان»، - دەدى رۋسلان قۋاتوۆ.
سىبايلاس جەمقورلىققا قارسى ءىس-قيمىل ۆەدومستۆوسى وكىلىنىڭ ايتۋىنشا، عابدوللا شورمانوۆ بۇل قىزمەتتەرى ءۇشىن ءار ورالماننان 200 مىڭ تەڭگە الىپ وتىرعان. شورمانوۆتىڭ مەملەكەتكە كەلتىرگەن شىعىنىنىڭ جالپى سوماسى 284 ميلليون تەڭگەنى قۇرادى. سوت وعان ەكى جىل جەتى اي باس بوستاندىعىنان ايىرۋ جازاسىن شىعاردى.
