09:12, 03 - قازان 2017 | GMT +5
لاس-ۆەگاستاعى قىلمىسكەردىڭ ۇيىنەن كوپ قارۋ-جاراق تابىلدى
استانا. قازاقپارات - پوليتسيا لاس-ۆەگاستاعى (نيەۆادا شتاتى) قاندى قىرعىندى ۇيىمداستىرۋشى قىلمىسكەرىنىڭ ءۇيىن ءتىنتۋ بارىسىندا 18 دانا قارۋ-جاراق، جارىلعىش زات جانە وق-دارىلەر تابىلدى، دەپ حابارلايدى ت ا س س.
بۇل تۋرالى دۇيسەنبى كۇنى لاس-ۆەگاس شەريفى دجوزەف لومباردو باسپا ءسوز كونفەرەنسياسىندا ءمالىم ەتتى.
«ەندى مەن نەۆادا شتاتىنداعى مەسكيتتەگى قىلمىسكەردىڭ ءۇيىن ءتىنتۋدىڭ ناتيجەسى جايلى ناقتى اقپاراتتار بەرە الامىن. ءتىنتۋ بارىسىندا 18 دانا دارىمەن اتىلاتىن قارۋ، وق-دارىلەر، جارىلعىش زات جانە ەلەكتر قۇرىلعىلارى تابىلدى. ءبىز قازىر ولاردى زەرتتەپ جاتىرمىز»، - دەدى ول.
ەسكە سالا كەتەيىك، جەكسەنبى كۇنى كەشكىسىن لاس-ۆەگاستاعى Mandalay Bay قوناق ءۇي-ساۋىقتىق كەشەنىنىڭ ماڭىندا بولعان كونسەرتتە اتىس بولدى. پوليتسيا مالىمەتتەرىنشە، قوناق ءۇيدىڭ 32-قاباتىنان 64 جاستاعى ستيۆەن پەددوك وق جاۋدىرعان. ول ءتارتىپ ساقشىلارى كەلگەنشە ءوز-وزىنە قول جۇمساپ ۇلگەرگەن.
