ليتۆالىق دارىگەر ارىقتاعىسى كەلگەن قازاقستاندىقتارعا وتا جاسادى

شىمكەنت. قازاقپارات - ليتۆالىق دارىگەر ارىقتاعىسى كەلگەن وڭتۇستىك قازاقستان وبلىسى تۇرعىندارىنا وتا جاسادى.

وبلىستىق كلينيكالىق اۋرۋحانادا 2 ناۋقاسقا لاپوروسكوپيالىق ادىسپەن اسقازان كولەمى كىشىرەيتىلدى، دەپ حابارلايدى قازاقپارات ءتىلشىسى.

ليتۆالىق حيرۋرگ الماتناس مالياتسكاس ارتىق سالماقتان ارىلا الماي جۇرگەندەردى وسىنداي جاڭالىعىمەن قۋانتتى. كاۋناس ۋنيۆەرسيتەتىنىڭ پروفەسسورىنىڭ پىكىرىنشە، اسقازان جاي عانا ءبىر تورسىق ەمەس، ول حيميالىق تەحنولوگيالار مەن ينجەنەرلىك ەسەپتەۋلەردەن اسا مۇقيات قۇرالعان ءوندىرىس تۋىندىسى. اللانىڭ بەرگەن ەرەكشە نىعمەتى. قورەك العاننان كەيىن مولشەرى 500 م ل- دەن 1500 م ل- گە جەتىپ، قارىنداعى ورنى كەڭەيەدى. ال كوپ مولشەردە تاماق جەۋ سەمىزدىك تۋدىرادى. وسىلايشا، بىلىكتى مامان 2001 -جىلدان بەرى اسقازاندى كىشىرەيتۋ ارقىلى ناۋقاستاردىڭ ءومىر ءسۇرۋ ساپاسىن جاقسارتۋمەن اينالىسۋدا.

«وتا جاساتۋ ءۇشىن ناۋقاستاردىڭ جاس شاماسى شەكتەلگەن. 16 دان تومەن جانە 65 تەن جوعارى بولماۋى شارت. ەگەر ناۋقاستىڭ جاس شاماسى 65 تەن جوعارى بولسا، وتادان كەيىنگى اسقىنۋلار بولۋى مۇمكىن»، - دەيدى پروفەسسور، حيرۋرگ.

ايتا كەتەيىك، بارياتريالىق وتا تەك ءۇشىنشى دارەجەلى سەمىزدىككە شالدىققاندارعا عانا جاسالادى. وپەراتسيادان كەيىن ناۋقاس اي سايىن از مولشەردە سالماق تاستاي باستايدى. سەبەبى تاماققا تابەتى ازايىپ، قوماعايلىق پروتسەسى تومەندەيدى. ءبىر وتىرعاندا تەك ەكى اس قاسىق تاماق ىشەتىن بولادى. سەمىزدىك سالدارىنان پايدا بولعان بۋىن اۋرۋلارى دا جويىلادى. دارىگەر قانت كورسەتكىشى دە تومەندەيتىنىن ايتادى.

«اسقازاندى تۇيىقتاۋ كەزىندە ول تيتاندى قىسقىشتارمەن تىگىلىپ، ەكى جاققا بولىنەدى. كىشكەنتاي اسقازانعا جىڭىشكە ىشەك تىگىلەدى. سولاي ادام وپەراتسيادان كەيىن وتە از تاماق جەيدى. تاماق كىشكەنتاي اسقازان جاقپەن وتەتىندىكتەن اعزالىق زاتتار ءسىڭىرىلىپ ۇلگەرمەيدى. بۇل وپەراتسيا %80 ارتىق سالماقتان ارىلۋعا مۇمكىندىك بەرەدى»، - دەيدى الماتناس مالياتسكاس.

ايتا كەتەيىك، ليتۆالىق حيرۋرگ ەۋروپادا بارياتريانى، ياعني سەمىزدىكتى ەمدەۋدى تۇڭعىش زەرتتەگەن عالىم. 17 جىلدا 2500 ازاماتتى ارتىق سالماقتان ارىلتقان. ول شىمكەنتتىك مامانداردىڭ شەبەرلىگىن شىڭداۋ ءۇشىن ارنايى كەلگەن بولاتىن. ءوڭىر دارىگەرلەرىنىڭ تاجىريبەسى تولىسىپ، وتانى وزدەرى جاساي الاتىن دارەجەگە جەتكەن سوڭ، ايماقتا سەمىزدىكتەن قينالعاندار قاتارى ەداۋىر ازايادى دەپ كۇتىلۋدە.