ۇيلەرى سۋىق استانالىقتار شاعىمدارىن اكىمگە تىكەلەي جولداي الادى

. قازاقپارات - استانا قالاسى سارىارقا اۋدانىنىڭ تۇرعىندارى پاتەرلەرىنىڭ سۋىق بولۋىنا قاتىستى شاعىمدارىن الەۋمەتتىك جەلى ارقىلى اكىمگە تىكەلەي جولداي الادى، دەپ حابارلايدى قازاقپارات.

اۋدان اكىمى ارمان تۇرلىبەكوۆ تۇرعىنداردان ءوز شاعىمدارىن فەيسبۋكتەگى جەكە اككاۋنتىنا جولداپ وتىرۋدى سۇرادى.

«قۇرمەتتى «سارى ارقا» اۋدانىنىڭ تۇرعىندارى، جىلىتۋ ماۋسىمى باستالعاننان بەرى «سارىارقا» اۋدانىنداعى ورتالىق جىلۋ بەرۋ جۇيەسىنە قوسىلعان 854 كوپپاتەرلى تۇرعىن ۇيگە جىلۋ بەرىلدى. سونىمەن قاتار، اۆتونومدى قازاندىقتارعا كوسىلعان 25 تۇرعىن ۇيگە دە جىلۋ تولىقتاي قوسىلدى.

ءبىراق كەيبىر كەزدە پاتەرگە جىلۋ بەرىلگەنىمەن جىلۋ رادياتورلارى سۋىق بولىپ قالا بەرەدى. بۇل كوپ جاعدايدا جىلۋ رادياتورلارىندا بوس اۋانىڭ قالۋى، جىلۋ قۇبىرىنىڭ جارىلۋى جانە تاعى دا باسقا سەبەپتەرگە بايلانىستى بولادى.

ەگەر سىزدەردىڭ پاتەرلەرىڭىز سالقىن بولسا، وندا تولىق مەكەن جايىڭىزدى وسى جازبانىڭ استىنا كورسەتۋىڭىزدى سۇرايمىن. كوممۋنالدىق قىزمەتتەر مەن قىزمەت كورسەتۋشى ۇيىمدار انىقتالعان ماسەلەلەردى شەشۋ ءۇشىن قاجەتتى شارالاردى قولدانادى»، - دەپ جازدى اكىم جەكە پاراقشاسىندا.

وسى ۋاقىتتا اۋدان باسشىسىنىڭ فەيسبۋكتەگى اككاۋنتىنا ءبىرقاتار شاعىم ءتۇسىپ ۇلگەردى. ارمان تۇرلىبەكوۆ ولاردى شەشۋ بويىنشا قول استىنداعى قىزمەتكەرلەرىنە جەلىدە وتىرىپ- اق تاپسىرما بەرۋدە.

ايتا كەتەيىك، ارىز-شاعىمدارمەن بىرگە حالىقتىڭ ريزاشىلىق لەبىزدەرى دە تۇسۋدە. سونداي-اق ازاماتتار پروبلەمانى شەشۋدىڭ مۇنداي يدەياسى وزگە اۋدان اكىمدەرىنە ۇلگى بولسا يگى دەگەن نيەتتەرىن بىلدىرۋدە.