ديماش قۇدايبەرگەن باتىس قازاقستاننىڭ قارتتار ۇيىندە بولدى - فوتو
گراند بالدىڭ سالتاناتتى شاراسى الدىندا «بار ماحابباتپەن» اكسياسى ۇيىمداستىرىلدى. ونىڭ اياسىندا ءانشى ديماش قۇدايبەرگەن وبلىستىق قارتتار ۇيىندەگى اتا-اجەلەرمەن كەزدەسسە، اكتەر، الماتى قالاسى ناۋرىزباي اۋدانىنىڭ ءماسليحات دەپۋتاتى اسىلحان تولەپوۆ ەرىكتىلەرمەن بىرگە جالعىزباستى قاريانىڭ اۋلاسىن تازالادى. كومپوزيتور ءارى ءانشى رەنات عايسين كورۋ قابىلەتى بۇزىلعان وبلىستىق بالالار مەكتەپ-ينتەرناتىنىڭ وقۋشىلارىمەن جۇزدەستى. ال جۋرناليست، تەلەجۇرگىزۋشى ءلايلا سۇلتان قىزى «انالار ءۇيىنىڭ» وكىلدەرىمەن جانە جالپى جاس قىزدارمەن ءتالىم-تاربيە، سالت-ءداستۇر تۋراسىندا اڭگىمەلەستى.
«3-قايىرىمدىلىق گراند بال شاراسى اياسىندا ۇيىمداستىرىلعان «بار ماحابباتپەن» اكسياسى كەزىندە ديماش قۇدايبەرگەن وبلىستىق قارتتار ۇيىندەگى اتا- اجەلەرمەن كەزدەستى»، - دەپ جازىلعان قايىرىمدىلىق بالدىڭ ينستاگرامداعى رەسمي اككاۋنتىندا.
«Love for all» - «بار ماحابباتپەن» تاقىرىبىمەن وتەتىن بيىلعى قايىرىمدىلىق بالدىڭ ماقساتى -اۋىر سىرقاتتارىنا قاراماستان، وزدەرىنىڭ شىنايى ماحاباتتارىمەن جەتى جىل بويى وزگەگە ۇلگى بولىپ كەلە جاتقان مارلەن مەن انەل ەسىمدى جاستارعا قاراجات جيناۋ. سونداي-اق قايىرىمدىلىقتان تۇسكەن اقشانى اۋىر دەرتكە شالدىققان وزگە بالالارعا بەرۋ كوزدەلگەن.
كەشتىڭ رەسمي شاراسى ورالداعى سالتانات سارايىندا وتەدى. وعان قاتىسۋشىلاردىڭ اراسىندا ديماش قۇدايبەرگەن، «ەۆروۆيدەنيە-2011» جەڭىمپازى ەلدار گاسىموۆ، پروديۋسەر جانار بايسەمىزوۆا، ءانشى ءارى اكتەر كامشات جولدىبايەۆا، كومپوزيتور رەنات عايسين، «باستاۋ» توبى، كەشتىڭ باستى كەيىپكەرلەرى - مارلەن مەن انەل، اكتەر ءارى دەپۋتات اسىلحان تولەپوۆ، انشىلەر ەركە ەسماحان جانە گۇلنۇر ورازىمبەتوۆالار بار.
كەشتىڭ اشىلۋىنا باتىس قازاقستان وبلىسىنىڭ اكىمى التاي كولگىنوۆتىڭ قاتىساتىنى كۇتىلەدى. قازاقستان جانە الەمدىك ساحنا جۇلدىزدارى ەستۋ قابىلەتى ناشار مەكتەپ-ينتەرناتتىڭ وقۋشىلارىمەن بىرگە ونەر كورسەتەتىن بولادى. 100 دەبيۋتانت پاۆانا، كادريل، فين پولكاسى بيلەرىن جانە ءشامشى ۆالسىن ورىنداماق.
