جانار ايجانوۆا: انشىلەردى ميلليونەر دەپ ويلايتىندارمەن كەلىسپەيمىن

استانا. قازاقپارات - ساناۋلى كۇن بۇرىن اقتوبەدە وتكەن «تۋعان جەر» رەسپۋبليكالىق فورۋمىنا قاتىسقان تانىمال ءانشى، تەرمەشى، سوڭعى كەزدە اكتريسا، تەلەجۇرگىزۋشى بولىپ جۇرگەن جانار ايجانوۆا «ءتىلشى» سايتىنا بەرگەن سۇحباتىندا اقتوبەلىكتەرگە نە ءۇشىن وكپەلەگەنىن ايتىپ بەردى.

«قازاقتا «وركەنىڭ ءوسسىن» دەگەن جاقسى ءسوز بار. اقتوبە وركەندەي بەرسىن، وسە بەرسىن. قاشان دا قىزمەت ەتۋگە دايىنبىز. قىزمەت ەتىپ تە ءجۇرمىن. جۇرگەن جەرىمدە اۋزىمنان اقتوبەمدى تاستامايمىن، شالقارىمدى تاستامايمىن. الماتىدا جۇرگەنىمىزگە وتىز جىل وتسە دە، اقتوبەنىڭ تىلىمەن سويلەيمىن»، - دەپ اڭگىمەسىن باستاعان ءانشى اقتوبە وبلىسىنا رەنىشى بولعانىن دا جاسىرماي ايتىپ بەردى.

«مەن شىنىمەن اقتوبەگە وكپەلەيتىنمىن. ويتكەنى، قانشاما كەلىپ كونتسەرت قويىپ جۇرگەنىمدە ءبىر 3-4 ءتۇيىر گۇلىن الىپ، امانداسىپ كەتۋگە جارامايتىن. بىلمەيمىن، كىم بولسا دا، تەك توناۋعا دايىن تۇراتىن. ارەندانىڭ اقشاسىن الىپ، ساۋدالاسۋعا كەلۋدى بىلەدى.

اقتوبەگە كوپ كەلمەي كەتتىم عوي. ال، ءبىراق، بيىلعى «تۋعان جەرگە تاعزىم» شاراسى، «تۋعان جەر» فورۋمى باسقا اڭگىمە. ونى شاتاستىرۋعا بولمايدى»، - دەدى ول.

جانار ايجانوۆا اقتوبەگە كۇندە كەلمەگەن سوڭ، ساعىناتىنىن جەتكىزدى.

«ەلگە دەپ كەلگەندە باسقاشا كەلەسىڭ، ساعىنىپ كەلەسىڭ. باسىمنان ءوتتى عوي. سول كەزدەرى بيلەت وتكىزگەندە قينالاسىڭ. كومەكتەسپەگەنى بىلاي تۇرسىن، اناۋسى كەلىپ ءبىر تونايدى، مىناۋسى كەلىپ تونايدى. كونسەرتكە كەلگەندە اقشا تابامىز دەپ كەلمەيسىڭ عوي.

اندا-ساندا ءبىر اينالىپ سوعىپ تۇراسىڭ. كونسەرت بەرگىڭ كەلەدى. باسقا جاققا بارعاندا دا كونسەرت بەرەسىڭ. نەشە ءتۇرلى قۇيتىرقى جاعدايلار بولىپ جاتادى. ءبىراق اۋىلعا كەلگەندە ءوزىڭنىڭ تۋعان جەرىڭە ارقانى كەڭگە سالىپ، راحاتتانىپ كەلەسىڭ عوي. الايدا، كوڭىلىڭدى ءتۇسىرىپ جىبەرەدى»، - دەيدى ول.

ايجانوۆا جەرگىلىكتى اتقارۋ ورگاندارىنا، تەلەارنالار مەن راديوستانتسيالارعا وكپەلى بولعانىن دا ايتتى.

«ءبىر جارناما بەرە قويايىن دەسەڭ، اكەلەرىنىڭ قۇنىن سۇرايدى. راديوڭ دا، تەلەۆيزورىڭ دا. ءسويتىپ، اناۋ كىشكەنە اقشانى قايدا جەتكىزەم دەپ دال بولاسىڭ. كەلگەن حالىق رەنجيدى. جارنامانى از بەرەسىڭ دەپ. سونداي كەزدە اكىمشىلىكتىڭ دە، تەلەۆيدەنيەڭنىڭ دە كومەگى كەرەك ەكەن. ءبىز ميلليونەر ەمەسپىز. تەك سول ءوزىمىزدىڭ انىمىزبەن جۇرەمىز. بىردە بار، بىردە جوق. انشىلەردى باي دەگەندەرمەن كەلىسپەيمىن. جۇرگەن ادامبىز. كىرىسىمىزدى ەسەپتەيدى دە، شىعىسىمىزدى ەسەپتەمەيدى. ءبىر ءان جازىپ كونسەرتكە شىعۋدىڭ وزىنە 3500-4000 دوللار كەتەدى. ءوزىمىزدىڭ قالتامىزدان. ونى ەشكىم كوتەرمەيدى. ونى سەن دە جاقسى بىلەسىڭ، مەن دە جاقسى بىلەمىن. اقشانى قالاي تابامىز، سولاي كەتەدى»، - دەپ مۇڭىن شاقتى ءانشى.