بەنزين باعاسى ءبىر ايدىڭ ىشىندە ءوسۋى مۇمكىن - قاز مۇناي گاز ونىمدەرى

استانا. قازاقپارات - «قاز مۇناي گاز ونىمدەرى» ج ش س باس ديرەكتورىنىڭ وپەراتسيالىق باسقارۋ جونىندەگى ورىنباسارى نۇركەن مىرزاعاليەۆ قازاقستاندا بەنزين باعاسى الداعى ۋاقىتتا قاي كەزدە قىمباتتايتىنىن ايتتى، دەپ حابارلايدى قازاقپارات.

«ءبىر ايدىڭ ىشىندە ءوسۋى مۇمكىن، ياعني ءبىز يمپورتتى ءونىمدى الا باستاعان كەزدە جوعارىلاۋى ىقتيمال»، - دەدى ول.

سونىمەن قاتار «قاز مۇناي گاز ونىمدەرى» وكىلى بىرنەشە كۇندە بەنزيندى تالونمەن بەرۋ ماسەلەسىنە قاتىستى جاعداي شەشىمىن تاباتىنىن اتاپ ءوتتى.

وسىنىڭ الدىندا ول ق م گ جانار-جاعارماي قۇيۋ ستانسالارىندا بەنزين نە سەبەپتى تالونمەن بەرىلىپ جاتقانىن ايتقان ەدى.

«ۇلگەرە الماي جاتقان وڭىرلەردە وتىن تالونمەن بەرىلىپ جاتىر. اتىراۋ مۇناي وڭدەۋ زاۋىتى جاقىندا جۇمىسىن باستاپ، ءتيىستى رەجىمگە شىقتى جانە قازىرگى كەزدە 8 مىڭ تونناعا جۋىق وتىن قازاقستاننىڭ بارشا وڭىرلەرىنە باعىتتالدى.

اتاپ ايتقاندا، بۇل شەكتەۋ كەيبىر وڭىرلەردە ورىن الىپ وتىر»، - دەدى مىرزاعاليەۆ. ونىڭ سوزىنە قاراعاندا، الداعى يمپورتتى (رەسەيدەن) ەسكەرە وتىرىپ، اي-92 بەنزينىنىڭ ءليترى 155-157 تەڭگە بولۋى مۇمكىن.

اۆتور: مارلان جيەمباي