بۇرىنعى مينيستر جاقسىلىق دوسقاليەۆ ءوزىن ساتىپ كەتكەن ادامدار تۋرالى ايتتى
ەڭبەك جولىن وتا جاساۋدان باستاعان ازامات مينيستر قىزمەتىن دە اتقاردى. ءىستى بولعان مينيسترلەردىڭ ىشىندە ەل الدىنا قايتا كەلىپ، ءوز قىزمەتىن جالعاستىرىپ جۇرگەن ازاماتتىڭ بۇگىنگى ويى قانداي؟ جاقسىلىق دوسقاليەۆ NUR. KZ پورتالىنا ەكسكليۋزيۆتى سۇقبات بەردى.
- ءسىز قانشالىقتى قولجەتىمدىسىز، كەز كەلگەن ادام ەسىگىڭىزدى قاعىپ، كومەك سۇراي الادى ما؟
- ارينە، قولجەتىمدىمىن. اۋىرىپ تۇرعان كەز كەلگەن ادامعا وتا جاساي بەرەم. مەنىڭ كومەگىمە مۇقتاج ادامدى قابىلداۋعا دايىنمىن. مەن سول ءۇشىن جۇرگەن اداممىن.
- ءوزىڭىزدىڭ دەنساۋلىعىڭىز قالاي؟ وتا ۇستىندە ساۋساقتارىڭىز دىرىلدەمەيدى مە؟
- اقىرىن. قارتتىقتان ورتاشا. مەنىڭ قولىم ەشقاشان دىرىلدەپ كورگەن جوق. تەك اياعىمدى ءسال سىلتەيمىن. شۇكىر، ازىرگە ءۇش ساۋساق كەرەمەت جۇمىس جاساپ تۇر.
- حالىق جاقتاپ، جوعارى باعا بەرەتىن ازاماتتار كوپ ەمەس. ءسىز سول ساناۋلىلاردىڭ ءبىرىسىز...
- ءيا، مەن قاراپ جۇرمەي سويتەم عوي، بىزگە ءبارى جاراسادى (كۇلىپ). بارلىعى ەڭبەكتىڭ ارقاسى. قانشاما ادامعا ءومىر سىيلادىق، باتاسىن الدىق. حالىقتىڭ سەنىمىن ەڭبەگىڭمەن عانا يەلەنەسىڭ. ماڭداي تەرىڭدى توگەسىڭ، تابانىڭدى توزدىراسىڭ.
- ءسىز ءبىر سۇقباتىڭىزدا «تاعدىرىم قيىن بولسا دا ريزامىن» دەگەنسىز. قيىندىقتى اباقتىدا بولعان ساتپەن بايلانىستىراسىز با؟
- ول جاقتى دا كورىپ شىقتىق. دۇشپاننىڭ دۇشپانى باراتىن جەر ەمەس. ول جاققا بارىپ بۇزىلىپ جاتقاندار دا بار... جالپى ءبىزدىڭ ۋاقىتىمىزدا ەشقانداي قيىندىق جوق. ءبىزدىڭ اتالارىمىز ناعىز قيىندىققا ءتۇستى. سوعىستى كوردى، اشتىق بولدى، قانشاما ادام قىرىلدى. قيىندىق دەگەن سول. بىزدىكى ءبىر شايدىڭ باتاسىنا تۇرمايتىن نارسە. مەن تاعدىرىما ريزامىن. تاعدىر بولعان سوڭ وڭاي بولمايدى. قيىندىقتى اتتاپ وتەمىز.
- ءسىزدىڭ كەمشىلىگىڭىز...
- وي، مەنىڭ كەمشىلىگىم كوپ. سەنگىشپىن. كەمشىلىگىم سول دەپ ويلايمىن. مەنى كىم الدامادى؟! تالاي الداندىم. ءبىراق، كەيىن وزدەرى قايتىپ كەلەدى. ولار ۇيالماعاننان كەيىن قالاي قىلامىن؟! پەندەمىز. ول الدادى ەكەن دەپ ونىڭ جاساعانىن جاساي المايمىن.
- ءسىز قالاي دەمالاسىز؟
- مەنىڭ ءۇش باقىتىم بار: ۇشەم نەمەرەلەرىم. سولاردى جاقسى كورەمىن. ءتىلى ءتاتتى. مەن ءۇشىن قازىر سولاردان قىزىق ەشتەڭە جوق. اتالاپ اكە-شەشەسىنىڭ ۇستىنەن شاعىم ايتادى. الماتىدا تۇراتىن بالاما بارعاندا «استاناعا الىپ كەت» دەپ ۇشەۋى كيىمدەرىن جيناپ جۇگىرەدى. ودان ارتىق نە كەرەك؟! ءبىر ۇل، ءبىر قىزىمنان جەتى نەمەرە كورىپ وتىرمىن. تورتەۋى قىزدان، ۇشەۋى ۇلىمنان. ۇلىمدا تورتەۋ بولاتىن ەدى. بىرەۋى قايتىس بولعاننان كەيىن اللا بىزگە ۇشەم بەردى. بارلىق قايعىنى جاپتى. بۇل بالالار كەلگەندە بارلىق جامان نارسە ۇمتىلىپ كەتتى. ۇيدە كۇندە كونسەرت.
- ءسىزدىڭ تۇندە كوز ىلمەگەنىڭىزدى، تاڭعى بەستەن باستاپ 10 ساعات بويىنا اياعىڭىزدان تىك تۇرىپ، وتادا بولعانىڭىزدى ەستىدىك. شارشاعاندىق بايقالمايدى، كوڭىلىڭىز كوتەرىڭكى...
- ءومىرى قىل ۇستىندە تۇرعان ادامدارعا ءومىر بەردىك. باۋىرى قىزمەت اتقارىپ جاتىر. وتباسى، اينالاسى، دارىگەرلەردىڭ بارلىعى قۋانىپ جاتىر. وسىنى كورىپ، مەن دە قۋانامىن. مۇنداي ساتتە شارشاعاندى بايقاۋ مۇمكىن ەمەس.
