تۇماۋعا قارسى ەكپە ءتيىمسىز بە؟
ول ءۇشىن جەرگىلىكتى بيۋدجەتتەن 28 ميلليون تەڭگەدەن استام قارجى بولىنگەن. الايدا، ايماق تۇرعىندارى تۇماۋعا قارسى ەكپەنىڭ تيىمسىزدىگىن ايتىپ وتىر. قىمبات ۆاكتسينانى سالدىرعاندار بىلتىر بىرنەشە رەت اۋىرعان، دەپ حابارلايدى Baq.kz ءتىلشىسى.
اقتوبەدە ءداستۇر بويىنشا تۇماۋ جانە وتكىر رەسپيراتورلىق ۆيرۋستىق ينفەكتسيالارعا قارسى جاپپاي ەگۋ باستالدى. بيىل 84320 اقتوبەلىك ەكپە الادى. ول ءۇشىن جەرگىلىكتى بيۋدجەتتەن 28 ميلليون تەڭگەدەن استام قارجى جۇمسالعان. الايدا، كەي تۇرعىن «بۇل اقشانى جەلگە ۇشىرۋ» دەپ وتىر.
«جىل سايىن تۇماۋعا قارسى ەگەدى. بۇل ەكپەنىڭ پايداسى از. جەكە پىكىرىم. دارىگەرلەر ايتقانداي، حالىقتىڭ ەكپەدەن كەيىن اۋىرماۋىنا ەش كەپىل جوق. مەن سوڭعى ەكى جىل قاتارىنان ۆاكتسينا الدىم. الايدا، قىستىڭ ورتاسىندا تۇماۋمەن اۋىرىپ، كەيىن اسقىندىرىپ الدىم. باسىم اۋىرىپ، تاماعىم ءبىتتى. ءبىرىنشى جىلى اعزاما جاقپاعان شىعار دەپ بىلتىر تاعى دا العانمىن. الايدا، وتكەن جىلى دا اۋىردىم. ياعني ەكى رەت شىعىندالدىم. ءبىرىنشى، ەكپە الۋعا اقشا جۇمساسام، ەكىنشىدەن، اۋىرعان سوڭ ءدارى الىپ ەمدەلدىم. بيىل تۇماۋعا قارسى ەكپە المايمىن» ، - دەيدى قالا تۇرعىنى سۆەتلانا.
«ەكپەنى تەگىن الاتىندار قاتارىنا جاتپايمىن. اقشاسى بارلار اقىلى تۇردە الادى عوي. مەنىڭ جاعدايىم جوق. بۇگىنگە دەيىن العان ەمەسپىن. مەنىڭشە، ەكپە «اقشا جاساۋدىڭ امالى» دەپ بىلەمىن. ءار ادامنىڭ اعزاسى ءارتۇرلى. بىرەۋگە جاعادى، بىرەۋگە كەرىسىنشە. ءتىپتى، ەكپە العان ادامنىڭ يممۋنيتەتى تومەندەپ كەتەدى دەگەندى دە ءجيى ەستيمىن. ياعني، اعزا السىرەپ، وزگە اۋرۋمەن كۇرەسە المايدى ەكەن. اۋىرسام، سارىمساق پەن ليمون بار. ءوزىم ەمدەلىپ الامىن» ، - دەيدى اسقار امان.
ال، دارىگەرلەر «تۇماۋعا قارسى ەكپەدەن كەيىن ادامنىڭ اۋرۋى جەڭىل تۇردە وتەدى» دەپ سەندىردى. يممۋندالعان ادام كوپ جاعدايدا اۋىرمايدى. اقتوبە وبلىسى بويىنشا، بىلتىر 277 ادام تۇماۋعا شالدىققان. بارلىعى ەكپە الماعاندار.
«بىلتىر تۇماۋعا قارسى ەكپە الدىم. بيىل دا الامىن. بۇگىنگە دەيىن اۋىرعانىم جوق. جالپى يممۋنيتەتتى ارتتىرادى. بالالارىمنىڭ دا بارلىق ەكپەنى تولىق الۋىن قاداعالايمىن. بىلتىر اقىلى تۇردە الدىم. ءوزىمنىڭ دەنساۋلىعىم ءۇشىن» ، - دەيدى قالا تۇرعىنى ايجان قادىر قىزى.
«تۇماۋدىڭ ەپيدەميالىق ماۋسىمى قازاننان ساۋىرگە دەيىن جالعاسادى. قاڭتاردا اۋرۋ ءورشيدى. سوندىقتان، تۇرعىندار ۆاكتسينادان باس تارتپاي، ەمدەلۋ كەرەك. بىلتىر وبلىس بويىنشا ۆاكتسينا الماعان 277 ادام تۇماۋمەن اۋىردى. ەكپە سالدىرعان ادامدار دا اۋىرۋى مۇمكىن. ءبىراق، جەڭىل تۇردە وتەدى. بۇل دالەلدەنگەن. تۇماۋ - ەڭ قاۋىپتى اۋرۋ. ادام يممۋنيتەتىن ازايتىپ، باسقا اۋرۋلارعا جول اشادى. ادام اعزاسى باسقا اۋرۋلاردىڭ اسقىنۋىنا اكەلەدى» ، - دەيدى اقتوبە وبلىستىق قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى مۇحتار سەربايەۆ.
وڭىرگە رەسەيدىڭ «گريپپول» ۆاكتسيناسىنىڭ 45 مىڭعا جۋىق دوزاسى كەلگەن. ءبىر دوزا قۇنى 1700-2500 تەڭگە ارالىعىندا. ال، بىلتىر اقتوبەدە ۆاكتسينا سالۋ باعاسى 1200-1400 تەڭگە بولعان ەدى.
«قازىر وبلىسقا 45 مىڭ دوزاعا جۋىق ۆاكتسينا كەلىپ تۇر. 32300 دەن استامى تەگىن سالىنادى. ال، قالعان 12 مىڭنان استام ەكپەگە مەديتسينالىق مەكەمەلەر تاپسىرىس بەردى. قالاعان تۇرعىن اقىلى تۇردە ەگىلە الادى. ەكپەنىڭ اسەرى 2 اپتادان كەيىن ءبىلىنىپ، 1 جىلعا جەتەدى» ، - دەيدى اقتوبە وبلىستىق دەنساۋلىق ساقتاۋ باسقارماسىنىڭ باس مامانى ارداق ورىنوۆا.
تۇماۋدىڭ اسقىنۋى ادام اعزاسىندا وزگە اۋرۋلاردىڭ تۋىنداۋىنا جول اشادى. ناۋقاستىڭ جۇرەگىنە، ميىنا اسەر ەتەدى. سوندىقتان، «تۇماۋعا قارسى يممۋندىق جۇيەمدى كۇشەيتەمىن» دەگەن ءار تۇرعىن ءوزى تىركەلگەن ەمحاناعا بارىپ ەكپە سالدىرتا الادى. دەگەنمەن، 6 اي تولماعان سابيلەرگە، جۇكتىلىكتىڭ العاشقى ايلارىنداعى ايەلدەرگە ەكپە سالىنبايدى. اللەرگياسى بار جانداردىڭ اۋرۋلارى اسقىنعان كەزدە ەكپە جاساتپاعانى دۇرىس. دارىگەردىڭ كەڭەسى.
اسەل ابات
Baq.kz
