نۇرلان نىعماتۋلين جاپونيانىڭ ەلشىسىن قابىلدادى

دەپ حابارلايدى ءماجىلىستىڭ باسپا ءسوز قىزمەتى.
قوس تاراپتىڭ العاشقى رەسمي كەزدەسۋىندە ەكىجاقتى قارىم- قاتىناستى ودان ءارى تەرەڭدەتۋدىڭ وزەكتى ماسەلەلەرى تالقىلاندى. تاراپتار بيىل ەكى ەل اراسىندا ديپلوماتيالىق بايلانىستىڭ ورناعانىنا 25 جىل تولعانىنا ايرىقشا نازار اۋدارا كەلىپ، وسى ۋاقىتتار ىشىندە جەتكەن جەتىستىكتەردى ودان ءارى ەسەلەي ءتۇسۋدىڭ ماڭىزدىلىعىنا ەرەكشە توقتالدى.
ن. نىعماتۋلين اتاپ وتكەندەي، قازاقستان پرەزيدەنتى نۇرسۇلتان نازاربايەۆ پەن جاپونيا پرەمەر- ءمينيسترى سيندزو ابە اراسىنداعى دوستىق قاتىناستىڭ ارقاسىندا ەكى ەل اراسىنداعى ىنتىماقتاستىق بۇگىنگى كۇنى بارلىق سالادا كەڭەيتىلگەن ستراتەگيالىق ارىپتەستىك دەڭگەيىنە جەتتى.
سونىمەن بىرگە، ءبىزدىڭ ەلدەرىمىز يادرولىق قارۋسىزدانۋ جانە تاراتپاۋ، اتوم ەنەرگياسىن بەيبىت ماقساتقا پايدالانۋ، تۇراقتى دامۋ باعىتىندا وتە جاقىن سەرىكتەستەر. ءماجىلىس ءتوراعاسىنىڭ پىكىرىنشە، ەكىجاقتى ىنتىماقتاستىقتى دامىتۋدا پارلامەنتتىك ديپلوماتيانىڭ وزىندىك ورنى بار. وسى رەتتە ءماجىلىس سپيكەرى ءبىزدىڭ ەلىمىز ەڭ دامىعان 30 ەلدىڭ قاتارىنا كىرۋ ماقساتىن قويعانىن، وعان جەتۋدە الدىڭعا قاتارلى مەملەكەتتەر تاجىريبەسىنىڭ ماڭىزدىلىعىن العا تارتا كەلىپ، بۇل جولدا 70 جىلدىق تاريحى بار جاپوندىق پارلامەنتاريزمنىڭ ىقپالى ايرىقشا ەكەنىن اتاپ ءوتتى.
ەلشى ءوز قىزمەتىنىڭ بىلتىر قازاقستان تاۋەلسىزدىگىنىڭ 25 جىلدىعىندا باستالىپ، بيىل قوس مەملەكەت اراسىنداعى ديپلوماتيانىڭ مەرەيتويلىق ماڭىزدى كەزەڭىمەن جالعاسىپ جاتقانىن، ءارقاشاندا ەلدەر اراسىنداعى دوستىق ءارى ارىپتەستىك ىقپالداستىقتى كۇشەيتۋگە دايىن ەكەنىن جەتكىزدى. كەزدەسۋ يەلەرى ەكسپو كورمەسى توڭىرەگىندەگى قورىتىندى وي- پىكىرلەرىن دە نازاردان تىس قالدىرمادى.