قىرعىز پرەزيدەنتتىگىنە كانديدات بابانوۆ ءوزىنىڭ نازاربايەۆپەن كەزدەسۋىنە قاتىستى پىكىر ءبىلدىردى

بۇل تۋرالى K- News حابارلادى.
بىشكەكتە وتكىزگەن باسپا ءسوز ءماسليحاتى كەزىندە ساياساتكەر سايلاۋشىلاردىڭ پروۆوكاتسياعا(قاساقانا ارانداتۋعا - رەد.) بەرىلمەۋىن سۇرادى. ونىڭ سوزىنشە باسەكەلەستەرى بابانوۆتىڭ ارەكەتىنە قاتىستى قولايسىز پىكىر قالىپتاستىرۋعا تىرىسۋدا.
«سوڭعى كۇندەردەگى وقيعالار - نازاربايەۆپەن كەزدەسۋىم، وڭ-ادىرداعى مالىمدەمەنىڭ ءۇزىپ-جۇلىپ جاريالانۋى، كەشەگى جوعارعى كەڭەش دەپۋتاتى مەنىڭ جاقتاسىم قانات يسايەۆتىڭ ۇستالۋى - ءبارى ءبىر-بىرىمەن بايلانىستى. ول ادامداردىڭ كوزدەگەنى ارانداتۋشىلىق. ءبارىن سابىرعا شاقىرعىم كەلەدى - ءبىز ەموتسياعا(قىزبالىققا - رەد.) بەرىلمەۋىمىز كەرەك. نە بولسا دا بارلىق زاڭ تالاپتارىن ساقتاي وتىرا مەن سايلاۋالدى سايىستى جالعاستىرامىن»، - دەدى بابانوۆ.
ول سايلاۋدىڭ ءادىل ءوتۋ كەرەكتىگىن دە ايتتى.
«جاڭا پرەزيدەنت ءادىل جولمەن كەلۋى ءتيىس. كەي ارنايى قىزمەت وكىلدەرىنىڭ باسشىلارى وزدەرىنىڭ كريمينالدىق بەدەلدەرىن پايدالانىپ جاتىر. كريميناليتەتتەردىڭ كىم ءۇشىن جۇگىرەتىندەرىن بىلەمىز، وعان بۇكىل قىرعىز حالقى كۋا. مەنىڭ كومپانيامنىڭ قارجىلاندىرۋى اشىق جۇرەدى. ءبىز 200 ميلليون سومداي اقشا جۇمسادىق. ال باسقا باسەكەلەستەر بيلبورد، جارناما ءۇشىن اقشانى قايدان الدى؟ ءبىر كۇن بيزنەسپەن اينالىسپاعان ادامدا اقشا قايدان بولادى»، - دەدى بابانوۆ.
بۇعان دەيىن بابانوۆ پەن قازاقستان پرەزيدەنتى نازاربايەۆ الماتىدا كەزدەسىپ، ەكىجاقتى ماسەلەلەردى تالقىلاعان بولاتىن. كەيىن بۇعان وراي قىرعىزستان س ءى م ارنايى نوتا جولداپ، قارسىلىق تانىتقان ەدى.