حالىقارالىق ومبى- مايقاپشاعاي جولى جوندەلىپ جاتىر

حالىقارالىق ماڭىزى بار نىساننىڭ قۇرىلىسىنا 500-دەن استام ادام مەن 300-دەن استام تەحنيكا تارتىلىپتى. مۇندا جولاۋشىلار توقتاپ، دەمالاتىن ورىندار دا زامان تالابىنا ساي جاساقتالعان. بارلىق جۇمىستار 2019 -جىلدىڭ كوكتەمىندە تولىق اياقتالۋى ءتيىس. ەلىمىزدىڭ ورتالىعى مەن شىعىسىن جالعايتىن بۇل كۇرە جولدىڭ ەكونوميكالىق ماڭىزى زور. تاس جولدىڭ قازاقستان ءۇشىن عانا ەمەس، رەسەي مەن قىتايعا دا ترانزيتتىك تيىمدىلىگى مول. جالپى ۇزىندىعى 89 شاقىرىم بولاتىن جولدى 2 كومپانيا سالىپ جاتىر. ونىڭ 42 شاقىرىمىن قايتا جاڭعىرتۋعا جاۋاپتى مەردىگەر مەكەمە جۇمىس ساپاسىنا ەرەكشە ءمان بەرەتىندىگىن ايتادى.
امانجول ۋاجانوۆ، ءبولىم باسشىسى:
- اسفالتتىڭ قالىڭدىعى 27 سانتيمەتر. بۇرىن كەڭەس ۇكىمەتى كەزىندە 9 سانتيمەتر عانا بولعان. ءبىرىنشى قاباتى 5، ەكىنشىسى 4 بولاتىن. ول كەزدە تەحنيكا از، ۇلكەن جۇك كولىكتەرى بولعان جوق. قوزعالىس قارقىنى دا از بولدى، قازىر زامان وزگەردى، الەمدىك تالاپتارعا ساي دامىپ بارامىز. اسفالت زاۋىتى تاۋلىگىنە 1200 توننا ءونىم شىعارادى. بۇگىنگە دەيىن 22 شاقىرىمعا اسفالت توسەلگەن، 20 قازانعا دەيىن تاعى 7 شاقىرىمدى قامتۋ جوسپاردا بار. كۇرە جولدىڭ بويىندا جولاۋشىلار ءۇشىن دە جوعارعى تالاپتارعا ساي دەمالىس ورىندارى سالىنادى.
ارمان سامالعاجى، مەردىگەر مەكەمە وكىلى:
- ەلباسىمىز ايتقانداي، دامىعان 30 مەملەكەتتىڭ قاتارىنا قوسىلۋىمىز قاجەت. سوعان بايلانىستى الەمدىك تالاپتارعا ساي، جولدىڭ بويىندا دەمالاتىن ورىندار جاسالادى. قىسى سۋىق بولعاندىقتان، توقتالاتىن كىسىلەرگە كولىگى سىنسا، جوندەۋگە، قولىن جۋسا، جىلى سۋى دا بولادى. جىلى اجەتحانا دا بولادى. مۇندا ارنايى اربامەن كىرە الاتىنداي پاندۋستار دا بولادى. وسىدان 2 جىل بۇرىن بۇل جولدىڭ 50 شاقىرىمىنان استامى كۇردەلى جوندەلگەن. ەندىگى جوسپار 2019 -جىلعا دەيىن تاعى 90 شاقىرىمعا جۋىق تەلىم قايتا جاڭعىرتىلۋى ءتيىس. ياعني سەمەي قالاسى مەن پاۆلودار وبلىسىنىڭ شەكاراسىنا دەيىنگى تاس جول تولىق جوندەلەدى.
www.24.kz