قارتتار ۇيىنە كەلگەن سوڭ كوزىمنەن جاس، كوكىرەگىمنەن شەر كەتپەدى - قاريا

اقتوبە. قازاقپارات - قارتتار مەن مۇگەدەكتەر ۇيىنە كەلگەن اعيلا ءامىروۆا ەكى اياعىن جامباسىنان كەستىرگەن.
None
None

بالالارى اناسىنىڭ كۇتىمىن جاساي الماعان سوڭ 4 اي بۇرىن مەملەكەتتىڭ قامقورلىعىنا وتۋگە شەشىم قابىلداپتى، دەپ حابارلايدى قازاقپارات ءتىلشىسى.

1 -قازاندا اقتوبە وبلىستىق قارتتار مەن مۇگەدەكتەر ۇيىندە مەرەكەلىك كەش ءوتتى. ستۋدەنتتەر ءوز ەركىمەن جۇرە الاتىن قاريالارعا ارناپ كونسەرت قويدى، ولارمەن بىرگە بيلەدى. قازىرگى ۋاقىتتا بۇل ينتەرنات ءۇيىن بارلىعى 240 ادام مەكەندەگەن. ولاردىڭ تەڭ جارتىسى مۇگەدەك. قارتتار ۇيىنە 4 اي بۇرىن كەلگەن اعيلا ءامىروۆا بۇل شەشىمدى قابىلداۋ وتە قيىن بولعانىن كوزىنە جاس الىپ، ايتىپ بەردى.

«ءوزىم اقتوبە وبلىسى تەمىر اۋدانى التىقاراسۋ اۋىلىندا تۇردىم. جوعارى ساۋاتىم جوق، تەك 7 كلاستىق ءبىلىمىم بار. اكەم سوعىسقا كەتىپ، ءىنىمدى باقتىم. قازىر جاسىم 83 كە كەلدى. كۇنى-ءتۇنى تىلدا ەڭبەك ەتىپ، قارا جۇمىستى تالعاماي ىستەگەن ەدىم. ءشوپ شابۋ، مال باعۋ، سيىر ساۋىپ، قىرمانعا بارۋ ءبىزدىڭ نەگىزگى جۇمىسىمىز بولدى. كەۋدەمدەگى توسبەلگىلەر جەڭىستىڭ 60، 70، 80 جىلدىعىندا بەرىلدى. قارتتار ۇيىنە كەلگەنىمە 4 اي بولدى. قالادا ءۇيىم بولدى، ءبىراق بالالارىم قارتايىپ، باعا المايتىن كۇيگە ءتۇستى»، - دەدى اعيلا ءامىروۆ.

 null

قاريا ءۇش بالا وسىرگەن. ەكى قىزى، ءبىر ۇلى، نەمەرە-شوبەرەلەرى دە بار. قازىر جاڭا مەكەنگە بەيىمدەلىپ، جان-جاعىمەن تانىسىپ جاتىر.

«ۇلىم جۇرەگىنە وتا جاساپ، مۇگەدەك بولدى. ۇلكەن قىزىم 65 جاستا، زەينەتكەر. ال كىشى قىزىمنىڭ ەكى بۇيرەگى اۋىرادى. مەنى كوتەرىپ، كۇتىم جاساۋعا مۇمكىندىگى جوق. ەكى اياعىمدى 6 جىل بۇرىن كەستىردىم. سەبەبى، قانت ديابەتى اۋرۋىنا شالدىعىپ، جارا شىعىپ، ءىرىڭداي باستادى. كۇن سايىن ەم الامىن، 6 رەت ينسۋلين بەرىلەدى. قانت اسسا، باسىمدى كوتەرە الماي، توسەكتە جاتامىن. ديەتا ۇستاۋ دا مۇمكىن ەمەس. بار تاماقتى ءىشىپ، جان ساقتاپ وتىرمىن. دارىگەرلەرگە العىس ايتامىن، كۇنى- ءتۇنى كۇتىم جاسايدى»، - دەدى قاريا.

«بالالارىم باعا الماسا قايدا بارامىن» دەپ كوزىنە جاس العان اعيلا ءامىروۆا قارتتار ۇيىنە قونىس اۋدارۋ تۋرالى شەشىمدى قابىلداپ، ەكى اي بويى كوزىنەن جاس كەتپەگەنىن جاسىرمادى.

«كوكىرەگىمنەن شەر، كوزىمنەن جاس كەتپەدى. ءۇيىمدى تاستاپ كەلۋ وڭاي ەمەس. قازىر جاڭا ورتاعا ۇيرەنىپ كەلەمىن. مەنەن دە باسقا ادامدار بار، مەن جالعىز ەمەسپىن. دەگەنمەن اۋىل تاماعىن ساعىنامىن. كەلگەن ادامدارعا «تالقان، قايماق اكەلىپ بەر» دەپ ءوتىنىش ايتامىن.

ديەتا ساقتاپ جۇرگەن ادامعا بۇل تاعامداردى جەۋگە بولمايدى. ءبىراق قۇرت پەن ىرىمشىكتى اڭسايمىن، جاسىرىن ساقتاپ، جەپ الامىن»، - دەدى اعيلا ءامىروۆا.

قاريانىڭ بالالارى مەن تۋىستارى جاعدايىن ءبىلىپ، كوڭىلىن سۇراپ قارتتار ۇيىنە كەلەدى. اقجارقىن انا بالالارىنا سالماق تۇسىرمەيىن، دەنساۋلىقتارى سىر بەردى دەپ، ءوزى شەشىم قابىلدادى. بۇل ىسىنە وكىنگەن ەمەس.

null

سوڭعى جاڭالىقتار