سىر بويىنداعى كووپەراتيۆتەر ەت تە، ءسۇت تە وندىرەدى

قىزىلوردا. قازاقپارات - اگرارلىق سەكتوردى قازىرگى زامانعى جاعدايدا دامىتۋدىڭ ءتيىمدى ءتاسىلى اۋىلشارۋاشىلىعى كووپەراتيۆتەرىنە بىرىگۋ ەكەندىگى بەلگىلى.

وسى باعىتتا جاسالعان جۇمىستار ناتيجەسىندە بۇگىندە ايماقتا 223 اۋىل شارۋاشىلىعى كووپەراتيۆى قۇرىلىپ وتىر. بۇل تۋرالى قازاقپارات ءتىلشىسى وبلىستىق اۋىلشارۋاشىلىعى باسقارماسىنا سىلتەمە جاساپ حابارلادى. باسقارمانىڭ ەسەبىنە سۇيەنسەك، بيىلعى التى ايدا 514 جەكە قوسالقى شارۋاشىلىقتىڭ بىرىگۋى ارقىلى 23 اۋىل شارۋاشىلىعى وندىرىستىك كووپەراتيۆتەرى قۇرىلدى (20 ەت باعىتىندا، 3 ءسۇت باعىتىندا، 1 باقشالىق، سونداي- اق، «اقمول» ا و ك - ءسۇت جانە ەت باعىتىندا جۇمىس جاسايدى) . قۇرىلعان كووپەراتيۆتەردى قارجىلاندىرۋ «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 -جىلدارعا ارنالعان باعدارلاماسى» اياسىندا وسى جىلعا بولىنگەن 1765 ميلليون تەڭگە قارجى ەسەبىنەن جۇزەگە اسىرىلادى. بۇگىنگى كۇنى «اۋىل شارۋاشىلىعىن قارجىلاي قولداۋ قورى» ا ق  قىزىلوردا فيليالى ارقىلى 15 كووپەراتيۆ 1 057,0 ميلليون. تەڭگە قارجىعا 6797 باس ءىرى قارا العان.

ناتيجەسىندە، بۇگىنگى كۇنى 274 وتباسىلىق مال بورداقىلاۋ الاڭدارى قۇرىلىپ، 4836 باس ءمۇيىزدى ءىرى قارا مالى بورداقىلانۋدا. سونىمەن قاتار، 1961 باس سيىر ساتىپ الىنىپ، 85 شاعىن وتباسىلىق ءسۇت فەرمالارى قۇرىلدى. بۇگىنگى كۇنگە قۇرىلىپ، نەسيە العان كووپەراتيۆتەر 160 توننا ەت، 40 تونناعا جۋىق ءسۇت ءوندىردى. مەملەكەتتىڭ ارنايى باعدارلامالارى ارقىلى قولداۋ تاۋىپ وتىرعان ەت جانە ءسۇت ءوندىرىسى ەلباسىنىڭ «ۇلت جوسپارى بەس ينستيتۋتسيونالدىق رەفورمانى جۇزەگە اسىرۋ جونىندەگى 100 ناقتى قادام» اتتى باستى قۇجاتتىڭ 60-61 قادامدارىندا: ءسۇت جانە ءسۇت ونىمدەرى ءوندىرىسىن دامىتۋ ءۇشىن ستراتەگيالىق ينۆەستورلار تارتۋ كەرەكتىگى باسا ايتىلدى. نەگىزگى مىندەت: ءۇش جىل مەرزىمدە ت م د ەلدەرى نارىعىنا شىعارىلاتىن ونىمدەرىنىڭ جارتىسىنا دەيىنگى ەكسپورتىن قامتاماسىز ەتۋ مىندەتى قويىلدى.

 

 اۆتور: ەلۋباي اۋەزوۆ