بولات نازاربايەۆ شامالعان اۋىلىندا باسپاناسىز جۇرگەندەرگە ءۇي سالىپ بەردى - فوتو

بۇل تۋرالى Tengrinews.kz حابارلايدى.
الماتى وبلىسى، قاراساي اۋدانى، شامالعان اۋىلىندا مۇگەدەكتەر، از قامتىلعان جانە كوپبالالى وتباسىلار جاڭا باسپاناعا يە بولدى. الماتى وبلىسىنىڭ اكىمى اماندىق باتالوۆ كورسەتىلگەن قايىرىمدى ىسكە العىسىن ءبىلدىردى.
«ءبىز بۇگىن قيىنشىلىق سەزىنىپ جۇرگەن جاندارعا ءۇي كىلتىن بەردىك. بۇعان ۇلكەن جۇرەكتى، ءوز ەلىن سۇيەتىن ازامات كومەكتەستى. مەن بولات ءابىش ۇلىنا ۇلكەن العىس ايتقىم كەلەدى. مۇنداي ىستەر ەشقاشان ۇمىتىلمايدى»، - دەدى باتالوۆ.
تۇرعىندار جاڭا باسپانالار تۋرالى جاقىندا عانا بىلگەن.
وسىلايشا بۇل كوپتەگەن ادامدار ءۇشىن توسىنسىي بولدى. الماتى وبلىسى اكىمدىگىنىڭ مالىمەتىنشە وسى جىلدىڭ ءساۋىر ايىندا باستالعان ءۇي قۇرىلىستارى 5 ايدا تولىق بىتكەن.
بيزنەسمەن مەملەكەتتىك «تۋعان جەر» باعدارلاماسى اياسىندا جەرلەستەرىنە وسىنداي كومەك كورسەتىپ وتىر.
اۋىلدا تۇرعىزىلعان 17 ۇيگە 124,5 ميلليون تەڭگە قاراجات جۇمسالىپتى.
بۇدان بولەك 35 ميلليون ينجەنەرلىك كوممۋنيكاتسيا جۇمىستارىنا بەرىلگەن.