17:41, 30 - قىركۇيەك 2017 | GMT +5
استانا جولدارىندا باعدارشامنىڭ قىزىل تۇسىنە وڭعا بۇرىلۋعا رۇقسات ەتىلۋى مۇمكىن
استانا. قازاقپارات - قازىرگى ۋاقىتتا قولدانىستاعى نورماتيۆتىك- قۇقىقتىق اكتىلەرگە وزگەرىس ەنگىزۋ ماسەلەسى قاراستىرىلىپ جاتىر، - دەپ حابارلايدى استانا اكىمدىگىنىڭ مەدياورتالىعى.

«كولىك قۇرالدارىنا جانە باسقا باعىتتاردان كەلە جاتقاندارعا، سونداي-اق جاياۋ جۇرگىنشىلەرگە جول بەرۋمەن باعدارشامنىڭ قىزىل تۇسىنە كولىكتىڭ بۇرىلۋىنا رۇقسات ەتۋ ءۇشىن نورماتيۆتى- قۇقىقتىق اكتىلەرگە وزگەرىس ەنگىزۋ بويىنشا ماسەلە قاراستىرىلۋدا. بۇل شەشىم كولىكتەردىڭ تۇرالاپ قالۋ ۋاقىتىن الدەقايدا تومەندەتۋگە كومەكتەسەدى»، - دەدى «استانا قالاسى جولاۋشىلار كولىگى باسقارماسى» م م باسشىسى بەكمىرزا يگەنبەردينوۆ.
سونىمەن قاتار، استانادا كوشە-جول جەلىسىنە جۇكتەمەنى تومەندەتۋ جانە قوعامدىق كولىكتىڭ الەۋەتىن ارتتىرۋ بويىنشا جوبالار ءارى قاراي جالعاسىن تاباتىنى ايتىلادى. وسىلايشا BusLane جوباسى جالعاسادى. جاڭا اۆتوبۋس جولاقتارى الداعى ۋاقىتتا ش. ءۋاليحانوۆ جانە س. سەيفۋللين كوشەلەرىندە پايدا بولادى ەكەن.