نازاربايەۆ ۋنيۆەرسيتەتىندە بىرنەشە باعدارلاما اشىلادى - فوتو

بۇل تۋرالى بۇگىن نازاربايەۆ ۋنيۆەرسيتەتىندە وتكەن اشىق ەسىك كۇن اكسياسى اياسىندا ب ا ق وكىلدەرىنە سۇحبات بەرگەن قابىلداۋ دەپارتامەنتىنىڭ ديرەكتورى گۇلناز بولەبايەۆا ايتتى، دەپ حابارلايدى قازاقپارات.
«بۇگىنگى كۇنى نازاربايەۆ ۋينۆەرسيتەتىندە 4200-دەن استام ستۋدەنت وقىپ جاتىر. ولار ماگيستراتۋرا، دوكتورانتۋرا، باكالاۆريات جانە ۋنيۆەرسيتەتكە وقۋعا ءتۇسۋ ءۇشىن دايىندىق باعدارلاماسى بويىنشا وقيدى. جالپى، ستۋدەنتتەر گۋمانيتارلىق جانە الەۋمەتتىك عىلىمدار، مەديتسينا، جوعارى بيزنەس، جوعارى مەملەكەتتىك ساياسات، جوعارى ءبىلىم بەرۋ، ينجەنەريا، عىلىم مەن تەحنولوگيالار مەكتەپتەرىندە بىلىمدەرىن شىڭدايدى»، - دەدى ول.
سونىمەن قاتار، ونىڭ ايتۋىنشا، بيىلدان باستاپ تاۋ-كەن ءىسى مەكتەبىندە ماگيستراتۋرا، ال جوعارى مەملەكەتتىك ساياسات مەكتەبىندە PhD ماماندىقتارى اشىلعان. ال كەلەسى جىلدان باستاپ باكالاۆريات ماماندىعى بويىنشا بىرنەشە باعدارلاما اشۋ كوزدەلگەن.
«ناقتى ايتقاندا مۇناي- گاز ينجەنەرياسى، تاۋ-كەن ءىسى جانە گەولوگيا ينجەنەرياسى باعدارلاماسىن اشۋ جوسپارىمىزدا بار. بىزدە بارلىق ساباقتار ءبىرىنشى كۋرستان باستاپ اعىلشىن تىلىندە جۇرگىزىلەدى. سونىمەن قاتار قازاق ءتىلى دە وقىتىلادى. جالپى نازاربايەۆ ۋنيۆەرسيتەتىنە تۇسكىسى كەلەتىن تالاپكەردىڭ ءبىلىمى جوعارى بولۋى ءتيىس»، - دەدى گۇلناز بولەبايەۆا.
دەپارتامەنت باسشىسىنىڭ ايتۋىنشا، مۇنان بولەك الداعى ءبىر ايدىڭ كولەمىندە نازاربايەۆ ۋنيۆەرسيتەتىنە تۇسكىسى كەلگەن تالاپكەرلەرگە دايىندىق كۋرسى اشىلىپ، وندا ولار اعىلشىن ءتىلىن جەتىك مەڭگەرەتىن بولادى.