وڭتۇستىكتە جاستار مال سويۋ مەن ات ەرتتەۋدەن جارىستى - فوتو
وتىرار اۋدانىنداعى «الاش» ەتنواۋىلىندا بايقاۋعا قاتىسۋشىلار اۋىلداعى جۇمىستى ىستەۋدەن جارىستى، دەپ حابارلايدى قازاقپارات حاا ءتىلشىسى.
ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ايتىلعان مىندەتتەردى جۇزەگە اسىرۋ ماقساتىندا جانە «سالت- ءداستۇر - ۇلتتىق رۋحتىڭ نەگىزى» تاقىرىبى اياسىندا ۇيىمداستىرىلعان جارىستار «اۋىلداعى ءبىر كۇنىم» جوباسىنىڭ بارىسىندا ءوتتى.
سايدىڭ تاسىنداي ىرىكتەلىپ، 5 كومانداعا بولىنگەن جاستار ۇلتتىق سالت-ءداستۇرىمىزدى جاڭعىرتۋ، شىعارماشالىق قابىلەت پەن ونەرگە دەگەن قۇشتارلىقتى ارتتىرۋ ماقساتىندا ءوزارا سىنعا ءتۇستى. ەر جىگىتتەر مال سويىپ، اتتى ەرتتەۋدەن، وتىن جارىپ، ساماۋرىن قويۋ مەن ءجۇن قىرقۋدان ەپتىلىكتەرىن تانىتتى. ال بويجەتكەندەر تابا نان ءپىسىرۋ مەن تۇيە ساۋۋدان، كۇبى ءپىسۋ مەن قۇرت جاساۋدان، باۋىرساق ءپىسىرۋ سەكىلدى سىنداردان ءوتتى.
وسىلايشا جاستار بار ونەرلەرىن ورتاعا سالدى. ءبىرى سىندا جەڭىلىس تاپسا، كەلەسى سىندا ەسە قايتارىپ، كورەرمەندەردىڭ دەلەبەسىن قوزدىردى. جينالعان قاۋىمعا تاماشا كوڭىل-كۇي سىيلادى. اسىرەسە، جاستاردىڭ اتتى ەرتتەۋ، مال سويۋ، ءجۇن قىرقۋ، كۇبى ءپىسۋ، قۇرت جاساۋ سىندارىنداعى ءساتى تارتىستى ءارى شيەلەنىستى ءوتىپ، قازىلار القاسىنىڭ باعا بەرۋىنە دە قيىندىقتارىن تۋدىردى.
سايىس قورتىندىسىندا «الاش» توبى ىنتالاندىرۋ سىيلىعىنا يە بولسا، ءۇشىنشى ورىن «قازاق جاستارى» كومانداسىنا بۇيىردى. «اي مەدەت» توبى ەكىنشى ورىن السا، «سامۇرىق» توبى جۇلدەلى ءبىرىنشى ورىندى الدى. جوبانىڭ باس بايگەسى مەن وتىرار اۋدانى اكىمدىگىنىڭ ارنايى جۇلدەسىنە «سارىجايلاۋ» توبى لايىق دەپ تانىلدى. جەڭىمپازدار مەن جۇلدەگەرلەردى ارنايى سىيلىقتارمەن ماراپاتتاعان اۋدان اكىمىنىڭ ورىنباسارى رىسكەلدى ءالىش پەن وبلىستىق جاستار رەسۋرستىق ورتالىعىنىڭ ديرەكتورى بەرەكە دۇيسەبەكوۆتەر ۇلت كوشباسشىسىنىڭ سىندارلى ساياساتىن وسكەلەڭ ۇرپاقتىڭ اراسىندا جان- جاقتى ناسيحاتتاۋ، سالت-ءداستۇرىمىزدى جاڭعىرتۋعا قوسقان ۇلەستەرى ءۇشىن جاستارعا اۋدان اكىمى ەرلان ايتاحانوۆتىڭ ىستىق ىقىلاسقا تولى العىسىن جەتكىزدى.
