شاڭحاي ۋنيۆەرسيتەتىندە قازاق ءتىلى مەن ادەبيەتى كافەدراسى اشىلدى

بۇل ورتاق جوبا قىتايداعى ق ر ەلشىلىگى مەن شاڭحاي قالاسىنداعى ق ر باس كونسۋلدىعىنىڭ قولداۋىمەن جۇزەگە استى.
سالتاناتتى شاراعا قازۇۋ رەكتورى، اكادەميك عالىم مۇتانوۆ باستاعان ۋنيۆەرسيتەت دەلەگاتسياسى قاتىستى. كەزدەسۋ بارىسىندا ش ش ت ۋ پارتيالىق كوميتەتىنىڭ ءتوراعاسى جياڭ فەن جوعارى وقۋ ورنىندا 30 شەت تىلىندە ماماندار دايىندالاتىندىعىن جەتكىزدى. جاڭا وقۋ جىلىنان قازاق ءتىلى وقىتىلا باستادى جانە وعان قىتايلىق ستۋدەنتتەر ۇلكەن قىزىعۋشىلىق تانىتۋدا. ول مامانداندىرىلعان كافەدرانى اشۋعا كورسەتكەن كومەگى مەن قولداۋى ءۇشىن قازۇۋ رەكتورى ع. مۇتانوۆ پەن قازاقستاننىڭ ديپلوماتيالىق قىزمەتىنە العىس ءبىلدىردى.
«قازۇۋ مەملەكەت باسشىسى ن. نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا قويىلعان تاپسىرمالاردى جۇزەگە اسىرۋ ءۇشىن ماقساتتى تۇردە جۇمىس ىستەۋدە. قازاق ءتىلىنىڭ دامۋىنا ەرەكشە كوڭىل بولىنۋدە. مەملەكەتتىك ءتىلىمىز كوپ ۇلتتى قازاقستاندا بىرىكتىرۋشى ءرول اتقارسا، قازاقستان مەن قىتايدىڭ دوستىعى مەن ىنتىماقتاستىعىن ارتتىرۋدا بايلانىستىرۋشى كوپىرگە اينالىپ وتىر. قازۇۋ جاھاندىق عىلىمي- ءبىلىم بەرۋ كەڭىستىگىنە ۇلكەن بەلسەندىلىكپەن ەنۋدە. قىتايلىق ج و و- لارمەن ارىپتەستىك بارىسىندا كوپتەگەن جوبالار جۇزەگە اسۋدا. سولاردىڭ ءبىرى رەتىندە شاڭحاي شەت تىلدەرى ۋنيۆەرسيتەتىندە قازاق ءتىلى مەن ادەبيەتى كافەدراسىنىڭ اشىلۋىن ايتا الامىز»، - دەپ اتاپ ءوتتى عالىم مۇتانوۆ.
قازاق ءتىلىن قازۇۋ وقىتۋشىلارى ۇيرەتەتىن بولادى. قازىرگى تاڭدا «قازاق ءتىلى مەن ادەبيەتى» ماماندىعى بويىنشا 13 قىتايلىق ستۋدەنت ءبىلىم الۋدا. ستۋدەنتتەرمەن كەزدەسۋ بارىسىندا قازۇۋ رەكتورى ۋنيۆەرسيتەت تۋرالى، اكادەميالىق ۇتقىرلىق باعدارلاماسى بويىنشا تاجىريبەدەن جانە تىلدىك تاعىلىمدامادان ءوتۋ مۇمكىندىگى جايلى ايتىپ، جاستاردى قىزىقتىرعان سۇراقتارعا جاۋاپ بەردى جانە وقۋدا ساتتىلىك تىلەدى. ول قىتايلىق ستۋدەنتتەرگە قازاق ءتىلىن وقىپ- ۇيرەنۋگە ارنالعان وقۋلىقتى سالتاناتتى تۇردە تابىس ەتتى.
«قازاقستاننىڭ جەتەكشى وقۋ ورنى - ءال- فارابي اتىنداعى قازۇۋ شەتەلدىك ج و و- لارمەن حالىقارالىق ىنتىماقتاستىقتا ۇلكەن تاجىريبەگە يە. وتكەن جىلدان باستاپ قازۇۋ- دىڭ قولداۋىمەن بەيجىڭ شەت تىلدەرى ۋنيۆەرسيتەتىندە دە قازاق ءتىلى ءپانى جۇرگىزىلە باستاعانىن اتاپ وتۋگە ءتيىسپىز. قازاق ءتىلى اتالمىش وقۋ ورنىندا وقىتىلاتىن 73- تىلگە اينالدى. شاڭحاي شەت تىلدەرى ۋنيۆەرسيتەتىندە بىرلەسە وتىرىپ اشىلعان كافەدرانىڭ بەلسەندى جۇمىس ىستەيتىنىنە جانە ونىڭ قازاق مادەنيەتى مەن ءتىلىنىڭ تانىلۋىنا، ەكى ەلدىڭ كورشىلىك جانە ءوزارا ءتيىمدى قارىم- قاتىناستارىنىڭ نىعايۋىنا وڭ ىقپال ەتەرىنە سەنەمىن»، - دەدى شاڭحاي قالاسىنداعى ق ر باس كونسۋلى جوشىحان قىراۋبايەۆ.
ساپار اياسىندا قازۇۋ مەن ش ش ت ۋ ىنتىماقتاستىق تۋرالى مەموراندۋمعا قول قويدى. ول جوعارى بىلىكتى مامانداردى دايارلاۋعا، سونداي- اق عىلىمي ءبىلىم بەرۋ سالاسىنداعى ورتاق قىزمەت اۋقىمىن كەڭەيتۋگە باعىتتالعان.