ساعىنتايەۆ و ق و باسشىلىعىنا كورشى وبلىس اۋەجايلارىن كورىپ قايتۋعا كەڭەس بەردى

ءوڭىر باسشىسى جانسەيىت تۇيمەبايەۆ وبلىس تۇرعىندارىنىڭ تۇرمىس- تىرشىلىگىن جاقسارتۋ ءۇشىن جاسالىپ جاتقان مۇمكىندىكتەر مەن العا قويىلعان مىندەتتەر تۋراسىندا باياندادى، دەپ حابارلايدى قازاقپارات ح ا ا ءتىلشىسى.
جانسەيىت قانسەيىت ۇلىنىڭ ايتۋىنشا، وبلىستاعى يندۋستريالدى- يننوۆاتسيالىق دامۋ باعدارلاماسى ءساتتى جۇرگىزىلۋدە. باعدارلاما اياسىندا جالپى 208 ميلليارد تەڭگەگە 162 جوبا ىسكە اسىرىلىپ، 9,5 مىڭ جاڭا جۇمىس ورنى اشىلدى. ونىڭ ىشىندە 2017 -جىلى 5 جوبا ىسكە قوسىلىپ، 2,3 ميلليارد تەڭگە ينۆەستيتسيا تارتىلدى. بۇگىنگى تاڭدا ىسكە قوسىلعان جوبالاردىڭ 94 پايىز جوسپارلى قۋاتىنا شىعىپ، 71 ميلليارد تەڭگەنىڭ ءونىمىن ءوندىردى.
«ەلباسىنىڭ اۋىل شارۋاشىلىعىن ەكونوميكالىق دامۋدىڭ جاڭا درايۆەرىنە اينالدىرۋ جونىندەگى تاپسىرماسىن ورىنداۋ ناتيجەسىندە، ءونىم كولەمى وتكەن جىلدىڭ ءتيىستى كەزەڭىمەن سالىستىرعاندا 1,9 پايىزعا ارتىپ، 257,4 ميلليارد تەڭگەنى قۇرادى. قازىرگى كەزدە وبلىستا قولايلى بيزنەس- كليماتتى قالىپتاستىرۋ جانە كاسىپكەرلىك باستامالاردى ىسكە اسىرۋ ءۇشىن بارىنشا جاعداي جاسالۋدا. بيىل جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى 176586 بىرلىككە جەتىپ، وتكەن جىلعا قاراعاندا ءوسىم 105 پايىزدى قۇرادى. بۇل كورسەتكىش بويىنشا ءوڭىرىمىزدىڭ رەسپۋبليكاداعى ۇلەسى - 15,2 پايىز قۇراپ، ءبىرىنشى ورىندى يەلەنىپ وتىر. شاعىن جانە ورتا كاسىپكەرلىك سۋبەكتىلەرى وتكەن جىلى 900 ميلليارد تەڭگەدەن استام ءونىم وندىرسە، بيىل ونىڭ كولەمى 960 ميلليارد تەڭگەگە جەتەتىن بولادى. بۇگىنگى تاڭدا «بيزنەستىڭ جول كارتاسى-2020» باعدارلاماسى ىسكە اسىرىلعاننان بەرى 1322 جوباعا مەملەكەت تاراپىنان 40 ميلليارد تەڭگەگە قولداۋ كورسەتىلدى.
جالپى، 2017 -جىلدىڭ 8 ايىنىڭ قورىتىندىسىمەن وبلىستا ماڭىزدى الەۋمەتتىك- ەكونوميكالىق كورسەتكىشتەردىڭ ءوسىمى جوعارىلادى» - دەدى ج. تۇيمەبايەۆ.
ءوڭىر باسشىسى مۇنىمەن قوسا، وبلىستا تۋريستىك سالانىڭ دا تۇراقتى دامىپ كەلە جاتقانىن مالىمدەدى. ايماقتا 195 تۋريستىك نىسان بار، ءوسىم - 31 پايىز. مۇندا كورسەتىلگەن قىزمەت كولەمى 1,7 ميلليارد تەڭگەنى قۇراپ، 43 پايىزعا ءوستى. بيىل وبلىسقا 128 مىڭ تۋريست كەلدى. بۇل وتكەن جىلدىڭ ءتيىستى كەزەڭىمەن سالىستىرعاندا 55,3 پايىزعا كوپ.
جانسەيىت قانسەيىت ۇلى وسى تۇستا ەكسپو-2017 حالىقارالىق كورمەسىن تاماشالاۋعا وڭتۇستىكتەن 151 مىڭ ادام بارعانىن دا اتاپ ءوتتى. ايماق باسشىسىنىڭ بايانداماسىن تىڭداعان ۇكىمەت باسشىسى باقىتجان ساعىنتايەۆ تۋريزم سالاسىن ءالى دە دامىتۋ جاعىن قاراستىرۋدى تاپسىردى. ءۇش ميلليونعا جۋىق حالقى بار وڭتۇستىكتىڭ اۋەجايى تالاپقا ساي كەلمەيتىنىن تىلگە تيەك ەتىپ، سالىستىرمالى تۇردە كورشى وبلىستاردىڭ اۋەجايلارىن قاراپ شىعۋعا كەڭەس بەردى. سونىمەن قاتار شەتەلدەن كەلگەن تۋريستەرگە قىزمەت كورسەتۋ ساپاسى مەن سەرۆيستىك ەكونوميكانى دامىتۋ قاجەتتىگىن، جاستارعا شەت تىلدەرىن ۇيرەتۋ كەرەكتىگىن ءسوز ەتتى. قالا بەردى ولاردى شەت مەملەكەتتەرگە تاجىريبە جيناقتاۋعا جىبەرۋدى شاقىردى. سول ارقىلى كيەلى جەرلەرى كوپ وڭتۇستىككە ساياحاتشىلاردى كوپتەپ تارتىپ، ولاردىڭ سانىن كوبەيتۋدى تاپسىردى.
«تۋريزم بويىنشا، وڭتۇستىكتە بۇل سالانى دا دامىتۋعا بولادى. بيىل تۇركىستانعا 21 مىڭ ادام كەلگەنىن ايتىپ وتىرسىزدار. ول تۇك ەمەس. تۇركىستانعا جىلىنا 200 مىڭ ادامداي تارتىپ، ولاردىڭ كەلۋى ءۇشىن جاعداي جاساۋ كەرەك. وسى باعىتتا جۇمىستى جولعا قويىپ جۇمىس ىستەۋىمىز قاجەت»، - دەدى پرەمەر- مينيستر.
اۆتور: اينۇر اقبايەۆا