18:02, 29 - قىركۇيەك 2017 | GMT +5
شەتەلگە ساپارلايتىن قازاقستاندىقتار ءۇشىن موبيلدىك قوسىمشا جاسالادى
استانا. قازاقپارات - ق ر سىرتقى ىستەر مينيسترلىگى جۋىق ارادا شەتەلگە شىعاتىن قازاقستاندىقتار ءۇشىن ارنايى موبيلدىك قوسىمشانى ىسكە قوسۋدى جوسپارلاپ وتىر، دەپ حابارلايدى «قازاقپارات» ح ا ا ءتىلشىسى.

«سىرتقى ىستەر مينيسترلىگى قازىرگى ۋاقىتتا شەتەلگە شىعاتىن قازاقستاندىقتارعا ارناپ موبيلدىك قوسىمشا جاساپ جاتىر. دەمەك، شەتەلدە وقىس جاعدايعا تاپ بولىپ قالعان ادامدار وسى موبيلدىك قوسىمشانىڭ قىزمەتىن پايدالانا الادى. ءبىز بۇل تۋرالى الداعى ۋاقىتتا تولىعىراق حابارلايمىز»، - دەيدى ق ر س ءى م باسپا ءسوز قىزمەتىنىڭ باسشىسى ءانۋار جايناقوۆ.
ونىڭ ايتۋىنشا، وتانداستارىمىزدىڭ تۇركيادا جول اپاتىنا ۇشىراۋ وقيعاسى ساپاردى الىن الا ساقتاندىرۋ قاجەتتىگىن كورسەتىپ وتىر.
«مەن تاعى دا ءبىزدىڭ مينيسترلىكتىڭ شەتەلدەگى مەكەمەلەرىنىڭ ءتىزىمى س ءى م- ءنىڭ رەسمي سايتىندا بارىن ەسكە سالىپ وتكىم كەلەدى. ولاردىڭ ءنومىرىن الىپ جۇرگەن دۇرىس. شەتەلدەگى مەكەمەلەر كەز كەلگەن جاعدايدا كومەك بەرەدى»، - دەيدى ول.
اۆتور: ايان بەكەن ۇلى