ەندى ءتىس اۋرۋىنان تابيعي جولمەن قۇتىلۋعا بولادى

استانا. قازاقپارات - استانادا وندىرىلەتىن ءتىس كاريەسىن پلومباسىز ەمدەۋ، تىسجەگىسىنەن زارداپ شەككەن، ويىلعان تىستەردى بۇرعىلاۋسىز ەمدەۋ ماقساتىندا قولدانىلاتىن سۇيىقتىق InnoDent-تى قازاقستاندىق جانە شەتەلدىك 200 گە جۋىق ءتىس ەمحانالارى قولدانادى، دەپ حابارلايدى Baq.kz اقپارات اگەنتتىگى.
None
None

«ءتىس ويىلعان كەزدە نەمەسە ءتىس اۋىرعان كەزدە بىردەن ءدارى قابىلداپ، بولماسا پلومبا قويۋۋدىڭ ەندى كەرەگى بولمايدى. سەبەبى ءبىز ۇسىنىپ وتىرعان ءونىم ويىلعان ءتىستى قالپىنا كەلتىرىپ، ءتىس ەمالىن بەكىتە تۇسەدى. قازىرگى كۇندە بۇل ءدارى رەسەيدىڭ، ۋكراينانىڭ جانە ءوز ەلىمىزدىڭ ءدارىحانالارىنان سىناقتان ءوتتى. قازىرگى ۋاقىتتا 200-گە جۋىق ءتىس ەمحانالارىندا قولدانىستا ءجۇر» - دەيدى ءدارىنى ويلاپ تاپقان قازاقستاندىق جاس عالىم باۋىرجان ايتۋوۆ.

ءتاتتىنى كوپ جەگەننەن نەمەسە جاس ەگدەلەگەن كەزدە جانە قازىرگى كەزدەگى ءتۇرلى تاعامداردىڭ اسەرىنەن ءتىستىڭ سەزىمتالدىعى - سۋىققا، ىستىققا جانە تاتتىگە توزبەۋشىلىگى ءجيى كەزدەسەدى. InnoDent سونداي اسەرلەردى دە باسۋعا قابىلەتتى.

«نەگىزىنەن بۇل ءدارىنى 1,5 جاستان جوعارعى بارلىق ادام پايدالانا الادى. دەگەنمەن جاس ەرەكشەلىگىنە وراي ءار ءدارىنىڭ ءوز قوسىندىسى، كۇشى، اسەر ەتۋ ەرەكشەلىگى دە ەسكەرىلگەن. وسى ورايدا ايتا كەتەرلىك ءبىر جاعداي، قازىرگى قولدانىستا جۇرگەن دارىلەرىمىز تەك ءتىس دارىگەرلەرىنىڭ كومەگىمەن، سولاردىڭ نۇسقاۋىمەن عانا قولدانىلادى. شاعىن قۇتىدا ۇنتاق تۇرىندە دايىندالعان ءدارىنى ارنايى سۋعا ەرتىپ، سونى اۋىرىپ تۇرعان نەمەسە سەزىمتالدىعى ارتقان تىسكە تامىزاسىز، 5 مينۋت وتكەن سوڭ تاماقتانا بەرۋگە بولادى» - دەيدى جاس عالىم.

بۇعان دەيىن ەلىمىزدىڭ بارلىق وڭىرلەرىندە جانە رەسەي مەن ۋكرايناعا ەكسپورتتالىپ كەلگەن ءونىمدى ەندى ەۋروپاعا تاراتۋ جوسپاردا بار. ول ءۇشىن.. .

«حالىقارالىق دارەجەدەگى پاتەنت الۋ كەرەك. ءبىر جىلدان استى حالىقارالىق دەڭگەيگە شىعاتىن پاتەنت الا الماي كەلەمىز. ەگەر پاتەنتىمىز قولعا تيسە ۇلىبريتانياعا شىعارا باستايتىن بولامىز. سەبەبى وندا بىزبەن بىرگە جۇمىس ىستەگەن عالىمدار بار. سودان كەيىن ەۋروپا نارىعىنا شىعارۋ جوسپاردا بار» - دەيدى «بولاشاق» ارقىلى نيۋ-يورك ۋنيۆەرسيتەتىنەن ءبىلىم العان جاس مامان.

باسقا دارىلەردەن ارتىقشىلىعى ءتىستى تابيعي جولمەن جەتىلتەتىن ءدارىنىڭ قۇرامى تەك قانا اقۋىزدان جاسالعان.

«مىسالى 8-9-اي بولعان نارەستەنىڭ قىزىليەگىنە شىعاتىن ءتىس بار عوي. سونى وسىرەتىن ارنايى اقۋىز بار، ءبىز سول اقۋىزدى الىپ، سونى وڭدەۋدەن وتكىزىپ، پايدالانىپ وتىرمىز. ءبىر ءتىستى ەمدەۋ قۇنى 5000 تەڭگە. ءبىز قازىر ءتىس ەمحانالارىمەن كەلىسىپ، سولار ارقىلى عانا ساتىپ وتىرمىز. ءبىراق ءۇي جاعدايىندا قولدانىۋ ازىرگە قيىنداۋ. سەبەبى جاڭا شىققان ءدارى بولعاندىقتان مامانداردىڭ ءتۇسىندىرۋى كەرەك» - دەيدى باۋىرجان ايتۋوۆ.

InnoDent -تى وندىرۋگە مەملەكەت تاراپىنان ۇلكەن قولداۋ كورسەتىلىپ وتىر. «بايتەرەك» ۇ ب ح قاراستى تەحنولوگيالىق دامۋ جونىندەگى ۇلتتىق اگەنتتىكتىڭ قارجىلاندىرۋىمەن ىسكە اسىپ كەلەدى.

InnoDent -تى وندىرۋگە ۇلتتىق اگەنتتىك يننوۆاتسيالىق جوبالاردى قولداۋ بويىنشا كومەك كورسەتكەن. بۇگىنگى تاڭعا دەيىن 40 ميلليوننان استام قارجى ءبولىندى. بۇل قارجىعا InnoDent كومپانياسى ارنايى جابدىقتار الىپ، ءتىس ەمحانالارىنا ارناپ جاڭا تەحنولوگيامەن ءدارى- دارمەك شىعارىپ وتىر» - دەيدى تەحنولوگيالىق دامۋ جونىندەگى ۇلتتىق اگەنتتىك ءتوراعاسىنىڭ ورىنباسارى ءومىرجان ءتاشىموۆ.

 

سوڭعى جاڭالىقتار