قازاقستان قۇراماسى دزيۋدودان پرەزيدەنت كۋبوگىنا يە بولدى

ەلىمىزدە تۇڭعىش رەت ۇيىمداستىرىلىپ وتىرعان پرەزيدەنت كۋبوگىنا 9 مەملەكەتتەن 10 كوماندا قاتىستى.
اتاپ ايتقاندا، قازاقستان، وزبەكستان، قىرعىزستان، ازەربايجان، گرۋزيا، موڭعوليا، رەسەي، ۋكراينا، وڭتۇستىك كورەيا، بەلارۋس ەلدەرىنىڭ جانە اقتوبە وبلىسىنىڭ قۇراما كومانداسى ءوزارا مىقتىنى انىقتادى.
اقتوبە قالاسىندا رەسپۋبليكالىق «تۋعان جەر» فورۋمى اياسىندا وتكىزىلگەن ق ر پرەزيدەنت كۋبوگىنا ارنالعان حالىقارالىق ءتۋرنيردىڭ اشىلۋ سالتاناتىنا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا مەن اقتوبە وبلىسىنىڭ اكىمى بەردىبەك ساپاربايەۆ قاتىسىپ، سپورتشىلارعا ساتتىلىك تىلەگەن بولاتىن. سونداي-اق، بيىل تۇڭعىش رەت ۇيىمداستىرىلىپ وتىرعان پرەزيدەنت كۋبوگىندا وليمپيادا چەمپيوندارى جاقسىلىق ۇشكەمپىروۆ، يۋريي مەلنيچەنكو، ەرماحان يبرايموۆ، باقتيار ارتايەۆ سىندى سپورت تارلاندارى قۇرمەتتى قوناق بولدى.
جارىس ناتيجەسى بويىنشا قازاقستان رەسپۋبليكاسى پرەزيدەنتى كۋبوگىنا قازاقستان قۇراماسىنىڭ سپورتشىلارى يە بولدى. قازاقستان قۇراماسىنان ەل نامىسىن عۇمار قىرعىزبايەۆ (66 كەلى)، ەلدوس جۇماحانوۆ (66 كەلى)، جانساي سماعۇلوۆ (73 كەلى)، قاجىمۇقان وتەۋليەۆ (81 كەلى)، سۇڭعات زاكاريايەۆ (90 كەلى)، يسلام بوزبايەۆ (90 كەلى)، ەرجان شىنكەيەۆ (100+ كەلى) ابىرويمەن قورعادى.
ولار فينالدىق كەزدەسۋدە وڭتۇستىك كورەيا سپورتشىلارىن 4:1 ەسەبىمەن جەڭىپ، ءتۋرنيردىڭ العاشقى جەڭىمپازى اتاندى.
قولا مەدال ءۇشىن كۇرەستە گرۋزيا مەن بەلارۋس قۇراما كومانداسىنىڭ سپورتشىلارى اراسىنداعى تاتامي تارتىسىندا گرۋزيالىق دزيۋدوشىلار باسىم ءتۇسىپ، ءتۋرنيردىڭ قولا جۇلدەسىنە قول جەتكىزدى.
2017-جىلى ۇيىمداستىرىلعان دزيۋدودان قازاقستان رەسپۋبليكاسىنىڭ پرەزيدەنتى كۋبوگىنا ارنالعان حالىقارالىق تۋرنيردە جەڭىمپاز بەن جۇلدەگەرلەرگە قارجىلاي سىياقىلار تابىستالدى.
نازارلارىڭىزعا جارىس قورىتىندىسىن ۇسىنامىز:
1-ورىن - قازاقستان قۇراماسى (4000000 تەڭگە)
2- ورىن - وڭتۇستىك كورەيا (2700000 تەڭگە)
3- ورىن - گرۋزيا (1700000 تەڭگە).
اۆتور: كۇنسۇلتان وتارباي