ديماش قۇدايبەرگەن اقتوبەلىكتەرگە ەرەكشە ىقىلاسىن جەتكىزدى –كەسكىن، فوتو

فورۋمعا ارنايى كەلگەن مەملەكەتتىك حاتشى گۇلشارا ءابدىقالىقوۆا مەملەكەتتىك-جەكەمەنشىك، بيزنەستىڭ الەۋمەتتىك جاۋاپكەرشىلىگى اياسىندا سالىنىپ جاتقان الەۋمەتتىك نىساندار قۇرىلىسىمەن، جۇمىسىمەن تانىستى.
جەكپە-جەك سارايىندا ءوتىپ جاتقان دزيۋدودان حالىقارالىق ءتۋرنيردى تاماشالاپ، ورتا مەكتەپتىڭ اشىلۋىنا قاتىستى. ال كەشكىلىك قوبىلاندى باتىر اتىنداعى ورتالىق ستاديوندا مەرەكەلىك شارا ءوتتى.
كونسەرتتە ميراس پەن قۇرالاي بەكجانوۆتار، جانار ايجانوۆا، قانات پەن سۆەتا ايتبايەۆتار ونەر كورسەتتى. كەيىن اقتوبەلىكتەرگە ديماش قۇدايبەرگەن «تۋعان جەر»، «جۇلدىزىم» كومپوزيتسيالارىن ورىنداپ بەردى.
«سىزدەردى كورگەنىمە وتە قۋانىشتىمىن. قازاقتا الىستان التى جاسار بالا كەلسە، الپىستاعى قاريا سالەم بەرەدى دەگەن جاقسى ءسوز بار. كىشكەنتاي عانا قوناق كادەمدى، ونەرىمدى باعالاپ، قول سوعىپ جاتقاندارىڭىزعا راحمەت! سىزدەردى قاتتى ساعىندىم، قاتتى جاقسى كورەمىن!»، - دەدى ديماش.
شارا بارىسىندا سونداي-اق «مۋزارت» توبى «ءوز ەلىم» ءانىن شىرقادى. ال تەاترلاندىرىلعان كورىنىس كەزىندە جاستار الاڭعا تارىنىڭ ماساعىن الىپ شىعىپ، كەيىن قانات پەن سۆەتا ايتپايەۆتاردىڭ ورىنداۋىندا «استانا» ءانى شىرقالعاندا بايتەرەك سيمۆولى سومدالدى.
ال وپەرا ءانشىسى ۆەنەرا الپىسبايەۆا «قارلىعاش» ءانىن ورىنداعاندا ورتالىق ستاديون اسپانىن قۇستار تورۋىلداپ، انگە ەرەكشە اسەر بەردى. مەرەكەلىك كونسەرت سوڭى وتشاشۋمەن اياقتالدى.
اۆتور: التىناي ساعىندىقوۆا