تۇرسىنبەك قاباتوۆقا استانا اكىمىنىڭ قۇرمەت ماراپاتى تابىستالدى
استانادا جىل سايىن قىركۇيەك ايىندا قازاقستان حالقى تىلدەرىنىڭ قالالىق فەستيۆالى ۇيىمداستىرىلىپ، شارا اياسىندا بارلىق مەكەمەلەردە ءبىر اي بويى ءتۇرلى ءىس-شارالار وتكىزىلەدى.
«مەنىڭ ءتىلىم - ۇلى دالا رۋحى» تاقىرىبىنداعى فەستيۆالدى ەلوردا اكىمدىگى بيىل 19-رەت وتكىزىپ وتىر. ءتىل فەستيۆالىنىڭ باستى ماقساتى - قازاق ءتىلىنىڭ قولدانۋ اياسىن كەڭەيتۋگە ىقپال ەتۋ، كوپ ۇلتتى مەملەكەتىمىزدىڭ بىرلىگى مەن دوستىعىن ناسيحاتتاۋ جانە ونىڭ فاكتورى رەتىندە مەملەكەتتىك ءتىلدىڭ ءرولىن ارتتىرۋ، جاستاردى پاتريوتتىققا باعىتتاۋ.
«بۇگىن ءبىزدىڭ شاھاردا ۇلكەن مەرەكە بولىپ جاتىر. ول - ءتىل مەرەكەسى. ەلباسىمىز نۇرسۇلتان نازاربايەۆ ءوزىنىڭ «رۋحاني جاڭعىرۋ» ماقالاسىندا ەل ىرگەسىنىڭ بەكۋىندەگى ءتىلدىڭ ماڭىزىن ەرەكشە اتاپ وتكەن بولاتىن. ءتىل ءبىزدىڭ ۇلتتىق مەملەكەتتىگىمىزدىڭ، ەلدىگىمىزدىڭ، مادەنيەتىمىزدىڭ باستاۋى. ماڭگىلىك ەلىمىز جاساسىن! ماڭگىلىك ءتىلىمىز جاساسىن! - دەدى قالالىق تىلدەردى دامىتۋ باسقارماسىنىڭ باسشىسى تىلەۋعالي قىشقاشبايەۆ.
كەش بارىسىندا قازاق تىلىنە سىڭىرگەن ەرەن ەڭبەگى ءۇشىن سپورت جانە ونەر يەلەرىنە استانا قالاسى اكىمى اسەت يسەكەشيەۆتىڭ «ءتىل تۇعىرى» قۇرمەت ماراپاتى تابىستالدى.
اقىن امانجول التايەۆقا ماراپاتتى ەلىمىزگە بەلگىلى مەملەكەت قايراتكەرى مىرزاتاي جولداسبەك ۇلى تاپسىرسا، ريو وليمپياداسىندا توپ جارعان بوكسشى دانيار ەلەۋسىنوۆكە ءتىل جاناشىرى ورازگۇل اسانعازى قىزى تابىس ەتتى.
سونىمەن بىرگە، ساياساتكەر ءاليحان بايمەنوۆ پەن عالىم عاريفوللا ەسىم ءازىل الەمىنىڭ جۇيرىگى تۇرسىنبەك قاباتوۆ پەن الەم بارىسى اتانعان ايبەك نۇعىماروۆقا سالتاناتتى تۇردە قۇرمەت ماراپاتىن تاپسىردى.
ايتا كەتەرلىگى، بيىل قالا اكىمدىگى «ءتىل تۇعىرى» قۇرمەت ماراپاتىن تۇڭعىش رەت تاپسىرىپ وتىر. كەش بارىسىندا قازاق ەستراداسىنىڭ تانىمال جۇلدىزدارى التىناي جورابايەۆا، ەسكەندىر يبراگيموۆ، مارجان اراپبايەۆا، قۋاندىق راحىم جانە ءداستۇرلى ءانشى جاسۇلان تاجيەۆ اننەن شاشۋ شاشىپ، كوپشىلىكتىڭ قوشەمەتىنە بولەندى.
