بيىلعى ق ر چەمپيوناتىندا الەم جانە وليمپيادا چەمپيوندارىن كورۋىمىز مۇمكىن

قازاقستان بوكس فەدەراتسياسىنان ءمالىم ەتكەندەي، بيىلعى ەل بىرىنشىلىگىندە كەز كەلگەن بوكسشى باق سىناي الاتىندىعىن ءمالىم ەتتى.
جارىسقا گامبۋرگتە وتكەن سوڭعى الەم چەمپيوناتىندا توپ جارعان قايرات ەراليەۆ تە قاتىسپاق. بوكسشىلار قازىر دەمالىستارىن اياقتاپ، جاتتىعۋ جۇمىستارىن پىسىقتاپ جاتقانى ايتىلادى.
وسى ورايدا ايتا كەتەيىك، وتكەن جىلى ريو-دە-جانەيرو وليمپياداسىنىڭ چەمپيونى اتانعان دانيار ەلەۋسىنوۆ جاقىندا ۇلتتىق قۇراماعا قايتا ورالاتىنى تۋرالى ءمالىم ەتكەن بولاتىن.
دەمەك، سوڭعى وليمپيادا ويىندارىنان كەيىن كورىنبەي كەتكەن ەلەۋسىنوۆتى، كاسىپقوي بوكستا ەكى رەت باعىن سىناپ كورگەن جانىبەك ءالىمحان ۇلىن جانە وليمپيادا ويىندارىنىڭ ەكى دۇركىن كۇمىس جۇلدەگەرى اتانعان ادىلبەك نيازىمبەتوۆتاردى ەل بىرىنشىلىگىندە قايتا كورۋىمىز مۇمكىن.
بوكسشىلار ءۇشىن قازاقستان چەمپيوناتىندا توپ جارۋ - قاشان دا ماڭىزدى. سەبەبى، ەل بىرىنشىلىگىندە باقتارى جانعان بوكسشىلار ۇلتتىق قۇراماعا قابىلدانىپ، ەلدىڭ ءىشى-سىرتىندا وتەتىن باستى دودالاردا ونەر كورسەتۋ مۇمكىندىگىنە يە بولادى.
سوندىقتان، ەلىمىزدىڭ استانا، الماتى قالالارىنان بولەك، 14 وبلىستان جينالاتىن بوكسشىلار ەل چەمپيونى اتانۋ ءۇشىن بارىن سالارى انىق.
ايتا كەتەيىك، بوكستان قازاقستان بىرىنشىلىگى 5-12- قاراشا كۇندەرى ارالىعىندا شىمكەنتتە وتەدى.
اۆتور: كۇنسۇلتان وتارباي