قىتايدا قازاق ۇنىنان جاسالعان كەسپەگە سۇرانىس جوعارى

«اعىمداعى جىلى استىقتىڭ ساپاسى وتە جاقسى بولدى. اقۋىز دەڭگەيى جوعارى، شامامەن 26-28 پايىز. سونىڭ ارقاسىندا شەتەلدىك ينۆەستورلاردى ەلىمىزدە استىقتى تەرەڭ قايتا وڭدەۋمەن بايلانىستى ءوندىرىس ورىندارىن اشۋعا تارتۋدامىز. ماسەلەن ماكورون ونىمدەرى، كەسپە دايىنداۋ. كۇنى كەشە عانا اۋىل شارۋاشىلىعى مينيسترلىگىندە وسى جەردە كەسپە شىعاراتىن زاۋىت سالعىسى كەلەتىن قىتايلىق ينۆەستورمەن كەزدەسۋىم ءوتتى. ۇنىمىز ينۆەستورلاردىڭ قىزىعۋشىلىعىن تۋدىرىپ وتىر. جوعارى سۇرىپتى ۇن كەسپە وندىرۋگە مۇمكىندىك بەرەتىن ساپاعا يە. ءتىپتى، قىتايدا قوعامدىق تاماقتانۋ ورنىنا نەمەسە مەيرامحاناعا كەلگەندە ولاردىڭ قازاقستاندىق ۇننان جاسالعان كەسپەگە تاپسىرىس بەرۋى ترەندكە اينالىپتى. ءبىز مۇنان ارى دا ىلگەرىلەپ، ءدال سول كەسپەنى قازاقستاندا شىعارىپ، قاپتاماعا سالىپ، ولارعا دايىن ءونىم تۇرىندە جىبەرە الار ەدىك»، - دەدى ۆيتسە- مينيستر.
ونىڭ ايتۋىنشا، قازىرگى ۋاقىتتا قىتايلىق ينۆەستور كەسپە شىعاراتىن زاۋىت قۇرىلىسىنا بايلانىستى استانا مەن قوستاناي وبلىستارىنىڭ اكىمدەرىمەن كەلىسسوزدەر جۇرگىزگەن. سولتۇستىك قازاقستان وبلىسىنىڭ مۇمكىنشىلىگىن نازارعا العان.
«ەندىگى ۋاقىتتا تاڭداۋ جەر ۋچاسكەسىنە، ينفراقۇرىلىمعا بايلانىستى بولماق. اتالعان كاسىپورىنعا قازاقستاندىق سەرىكتەس تە بار. مەنىڭشە، ول استانانىڭ ازىق- تۇلىك بەلدەۋىندە بولاتىن سياقتى. جوبا قۇنى شامامەن 47 ميلليون دوللاردى قۇرايدى. وندىرىستىك قۋاتى تاۋلىگىنە شامامەن - 700 توننا كەسپە. كەيىن بۇل كورسەتكىش تاۋلىگىنە 1 مىڭ تونناعا دەيىن جەتكىزىلەدى»، - دەدى گۇلميرا يسايەۆا.
اۆتور: مارلان جيەمباي