وتاندىق تىڭايتقىشتار شەتەلگە ەكسپورتتالادى

استانا. قازاقپارات - قازاقستاندا وندىرىلگەن وسىمدىك تىڭايتقىشتارى شەت ەلدەرگە ەكسپورتتالا باستادى. استاناداعى كەشەندى قۇنارلاندىرعىش شىعاراتىن كومپانيا وتاندىق نارىقتى قامتىپ قانا قويماي، تاجىكستان مەن قىرعىزستان ەلدەرىنە دە ءوز ونىمدەرىن جەتكىزىپ وتىر. ال كەلەر جىلدان باستاپ رەسەي نارىعىنا شىعۋدى كوزدەيدى.

 «اۋىلشارۋاشىلىق داقىلدارىنىڭ بارلىق تۇرىنە پايدالى بۇل بيوونىمگە سۇرانىس ارتىپ كەلەدى»، - دەيدى ماماندار.

 سەبەبى تىڭايتقىش كەز كەلگەن وسىمدىكتىڭ ونىمدىلىگىن 100 پايىزعا دەيىن ارتتىرادى. ال ءوندىرىس ورنىنىڭ ءبىر جىلدا 20 مىڭ توننا سۇيىق جانە قۇرعاق ءونىم شىعارۋعا قاۋقارى بار.

رۇستەم اليەۆ، مينەرالدى- ورگانيكالىق تىڭايتقىش شىعاراتىن كومپانيا ديرەكتورى:

 - ءبىزدىڭ ونىمدەردى باۋ- باقشامەن اينالىساتىن شارۋا قوجالىقتارىنان باستاپ، اگرارلىق كومپانيالارعا دەيىن پايدالانا باستادى. ەلىمىزدىڭ ءار وڭىرىنەن سۇيىق جانە قۇرعاق تىڭايتقىشتارعا سۇرانىستار ءتۇسىپ جاتىر. سەبەبى ءبىزدىڭ قۇنارلاندىرعىشتار توپىراققا ەمەس، وسىمدىكتىڭ جاپىراعىنىڭ ۇستىنەن سەبىلەدى. بۇل ارقىلى وسىمدىكتىڭ ونىمدىلىگى ارتا تۇسەدى.

 ايتا كەتۋ كەرەك، كومپانيا ءوز جۇمىسىن بيىل اقپان ايىندا باستاعان بولاتىن. جوباعا ۇكىمەت قولداۋ كورسەتىپ، باعدارلاما بويىنشا 355 ميلليون تەڭگە كولەمىندە گرانتقا قول جەتكىزگەن. شارۋاسىن ۇرشىقشا يىرگەن ءوندىرىس ورنى سودان بەرى 400 ميلليون تەڭگەنىڭ ءونىمىن ءوندىرىپ، ىشكى نارىقتى تولىق قامتىدى.

 ءومىرجان ءتاشىموۆ، تەحنولوگيالىق دامۋ جونىندەگى ۇلتتىق اگەنتتىك ءتوراعاسىنىڭ ورىنباسارى:

- ونىمدىلىكتى ارتتىرادى وسى تەحنولوگيا بويىنشا. 30-دان 100 پايىزعا دەيىن وسىرەدى. قازىر قاراپ وتىرساق، وسى كومپانيا جارتى جىلدا 400 ميلليون تەڭگەنىڭ ءونىمىن ءوندىرىپ، ارى قاراي 20 مىڭ توننادان جوعارىلاتىپ وتىرىپ، رەسەي، ۋكراينا نارىعىنا شىعادى. سول ارقىلى ەكسپورتتىق الەۋەتتى ارتتىرۋدى كوزدەيدى.

www.24.kz