قىزىلوردادا «قورقىت جانە ۇلى دالا سازى» ونەر فەستيۆالى وتەدى

ەلباسى ءوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «جاڭعىرۋ اتاۋلى بۇرىنعىداي تاريحي تاجىريبە مەن ۇلتتىق داستۇرلەرگە شەكەدەن قاراماۋعا ءتيىس. كەرىسىنشە، زامانا سىنىنان سۇرىنبەي وتكەن وزىق داستۇرلەردى تابىستى جاڭعىرتۋدىڭ ماڭىزدى العىشارتتارىنا اينالدىرا ءبىلۋ قاجەت. ەگەر جاڭعىرۋ ەلدىڭ ۇلتتىق- رۋحاني تامىرىنان ءنار الا الماسا، ول اداسۋعا باستايدى.. .. مەن حالقىمنىڭ تاعىلىمى مول تاريحى مەن ىقىلىم زاماننان ارقاۋى ۇزىلمەگەن ۇلتتىق سالت- داستۇرلەرىن الداعى وركەندەۋدىڭ بەرىك ءدىڭى ەتە وتىرىپ، ءاربىر قادامىن نىق باسۋىن، بولاشاققا سەنىممەن بەت الۋىن قالايمىن»، - دەپ اتاپ وتكەن بولاتىن.
ەرتەڭ وڭىرلىك كوممۋنيكاتسيالار قىزمەتىندە تۇركىتىلدەس ونەرپاز قوناقتار مەن فولكلورتانۋشى عالىمداردىڭ قاتىسۋىمەن باسپا ءسوز- كونفەرەنتسياسى ءوتىپ، شارانىڭ شىمىلدىعى تۇرىلەدى.
فەستيۆال يران عايىپتىڭ «قورقىتتىڭ كورى» سپەكتاكلىنىڭ كورسەتىلىمىنەن باستالادى. شارا اياسىندا، «تۇران تاڭبالارى» اتتى سىر ەلى قولونەر شەبەرلەرىنىڭ ەتنوارحەولوگيالىق كورمەسى ۇيىمداستىرىلىپ، فولكلور- تانۋشى عالىمداردىڭ، ونەر زەرتتەۋشىلەرى مەن فەستيۆال قوناقتارىنىڭ قاتىسۋىمەن «قورقىت اتا مۇراسى: ەپيكالىق مادەنيەت، حالىق اڭىز اڭگىمەلەرى جانە اۋەندەرى» تاقىرىبىندا حالىقارالىق عىلىمي- تەوريالىق كونفەرەنسيا وتەدى.
بۇدان بولەك، بولات شامعالي ۇلى سارىبايەۆتىڭ 90 -جىلدىعىنا ارنالعان «بولات سارىبايەۆ جانە تۇركى الەمىندەگى ەتنو اسپاپتانۋ ماسەلەلەرى» اتتى عىلىمي- پراكتيكالىق كونفەرەنسيا جوسپارلانعان.
فەستيۆالدا قازاقستان، ازەربايجان، وزبەكستان، قىرعىزستان، انگليا، رەسەي (تاتارستان، باشقۇرتستان) تۇركيا، قىتاي ەلدەرىنىڭ، سونداي- اق تۇركسوي مەن تۇركى اكادەمياسىنىڭ وكىلدەرى، كورنەكتى عالىمدار مەن ونەرتانۋشىلار باس قوسادى دەپ كۇتىلۋدە.
سونداي- اق، مەيماندار رامىزدەر الاڭى، وبلىستىق تاريحي- ولكەتانۋ مۋزەيى جانە قالانىڭ تاريحي ورىندارىمەن تانىسادى دەپ كۇتىلۋدە. قورقىت اتا مەموريالدى ەسكەرتكىشىنە بارىپ، «سالت- ءداستۇرى ساقتالعان سىر ەلى» اتتى ەتنواۋىل كورىنىستەرىن تاماشالايدى.
«قورقىت جانە ۇلى دالا سازى» اتتى حالىقارالىق فولكلورلىق- مۋزىكالىق ونەر فەستيۆالىنىڭ سالتاناتتى اشىلۋى 28 - قىركۇيەك كۇنى ساعات 19.00-دە بولادى.
شارانىڭ گالا- كونسەرتى جانە جابىلۋ سالتاناتى 29 - قىركۇيەكتە ساعات 18.00-دە قورقىت اتا مەموريالدى كەشەنىندە وتەدى.
فوتو BNews.kz
اۆتور: ەلۋباي اۋەزوۆ