09:09, 28 - قىركۇيەك 2017 | GMT +5
ۇشقىشسىز تۇڭعىش اۋە تاكسيى كوككە كوتەرىلدى
استانا. قازاقپارات - وسى اپتانىڭ باسىندا دۋبايدا تۇڭعىش اۆتونومدى اۆياتاكسي اۋەگە كوتەرىلدى، دەپ حابارلايدى WAM اگەنتتىگى.

اگەنتتىك مالىمەتىنشە، ەكى ورىندىق ۇشۋ اپپاراتىن باس كەڭسەسى گەرمانيادا ورنالاسقان Volocopter كومپانياسى جاساپ شىعارعان.
اۆتونومدى اۋە تاكسيىندە وپەراتور نەمەسە ۇشقىش بولمايدى، ياعني اپپارات «باتىل» جولاۋشىلاردى ءوزى تاسىمالدايدى.
ەرەكشە تاكسيدىڭ العاشقى تەستىلىك ۇشىرىلىمىنان كەيىن دۋبايدىڭ مۇراگەر حانزاداسى بۇل بىرىككەن اراب امىرلىكتەرىنىڭ بولاشاعى ءۇشىن جاسالعان تاعى ءبىر ءساتتى قادام بولعاندىعىن اتاپ ءوتتى.
«بۇل ءبىزدىڭ وڭ وزگەرىستەرگە بەيىمدىلىگىمىزدىڭ تاعى ءبىر دالەلى. ءبىز قوعامىمىزدى ودان ءارى باقىتتى ءارى وركەنيەتتى ەتۋ ءۇشىن ۇنەمى جاڭا مۇمكىندىكتەردى ىزدەۋ ۇستىندەمىز»، - دەدى شەيح حامدان يبن موحاممەد ال ماكتۋم.