باقاۋوۆ مەديتسينا سالاسىندا جاعدايى تومەن ستۋدەنتتەردى بيۋدجەت ەسەبىنەن وقىتۋدى تاپسىردى

ايماق باسشىسى مۇنداي پىكىردى جاستار ساياساتى جانە پاتريوتتىق تاربيە جونىندەگى كەڭەستىڭ وتىرىسىندا ءبىلدىردى.
«ستۋدەنت نەمەسە ونىڭ وتباسى ومىردە قيىن جاعدايعا تاپ بولاتىن ساتتەر ورىن الادى. سوندىقتان كەيدە وقۋىن تاستاپ كەتۋگە ءماجبۇر بولادى. مۇنداي جاعدايدا بيۋدجەت ەسەبىنەن وقۋ اقىسىن تولەۋدى ۇسىنا الامىز. دەگەنمەن ۋنيۆەرسيتەتتى اياقتاعاننان كەيىن جاس مامان ءبىزدىڭ وڭىرگە كەلىپ، كەم دەگەندە بەس جىل ەڭبەك ەتۋى ءتيىس. ءبىز وسىلايشا 4-5 جىلدىڭ ىشىندە وقىعان دارىگەردى تارتا الامىز. بۇل ءۇشىن ءاربىر اۋدان مەن قالانىڭ باسشىلارى قانداي مامانداردىڭ جەتىسپەيتىنىن انىقتاپ، بيۋدجەتتە قاجەت رەسۋرس قاراستىرۋى ءتيىس». دەيدى وبلىس اكىمى.
بولات باقاۋوۆ كاسىبي باعدارلاۋ جۇمىستارىن جۇرگىزۋ ءۇشىن سەمەي مەملەكەتتىك مەديتسينالىق ۋنيۆەرسيتەتىنە بارىپ كەلۋدى ۇسىندى. بۇدان باسقا، الداعى ۋاقىتتا جەرگىلىكتى قازىنا ەسەبىنەن وقىتىلاتىن ماماندىقتاردى تىزىمگە ەنگىزۋ تاپسىرىلدى. سونىمەن قاتار، كەزدەسۋ بارىسىندا پاۆلودارلىق كوللەدجدەرى تۇلەكتەرىنىڭ ەڭبەكپەن قامتىلۋى تۋرالى ءسوز قوزعالدى.
بەلگىلى بولعانداي، 1 - قىركۇيەك كۇنى ولاردىڭ 99,1 پايىزى جۇمىسقا كىرىسكەن، جوعارى وقۋ ورنىنا تۇسكەن نەمەسە اسكەر قاتارىنا وتان الدىنداعى بورىشىن وتەۋگە اتتانعان. قالعان 45 ادام جۇمىس ىزدەپ ءجۇر. ولاردىڭ التاۋى - «اقپاراتتىق جۇيە»، «ءسۇت ونىمدەرىن شىعارۋ»، «ازىق- تۇلىك ونىمدەرىن شىعارۋدى ۇيىمداستىرۋ تەحنولوگياسى»، «ءتۇستى مەتالدار مەتاللۋرگياسى»، «ەمدەۋ جانە مەدبيبى ءىسى» جانە باسقا دا ماماندىقتار يەسى. ءبىلىم بەرۋ باسقارماسىنىڭ باسشىسى باقىت بەكسەيىتوۆانىڭ ايتۋىنشا، ولاردىڭ ارقايسىسىمەن جەكە جۇمىس جۇرگىزىلگەن.