ەركەكتىڭ جىنىستىق مىندەتى

ساحابا ابدۋللاھ يبن امر (ر. ا. ) كۇن سايىن ورازا ۇستاپ، ءتۇنىن قۇران وقۋمەن وتكىزەتىن. جۇبايىنا كوپ جاقىنداي بەرمەيتىن. تۋىستارىمەن شۇيىركەلەسۋگە ۋاقىت بولمەيتىن. ءبىر كۇنى ايەلى قايىن اتاسىنا وسىنى ايتىپ شاعىمدانادى. ءابدۋللانىڭ اكەسى جاعدايدى پايعامبارىمىزعا بىلدىرەدى. سوندا پايعامبارىمىز (ساللاللاھۋ ءالايھي ءۋا ءساللام) الگى ساحاباسىن شاقىرىپ الىپ: «جۇبايىڭنىڭ سەندە اقىسى بار. قوناقتارىڭنىڭ دا اقىسى بار، دەنەڭنىڭ دە اقىسى بار. بۇلاردى ۇمىت قالدىرما» ، - دەپ وسيەت ايتادى. ارينە، ءتۇندى قۇران وقۋمەن وتكىزگەن جاقسى. ءبىراق ادام بالاسى قارسى جىنىستىڭ دا اقىسىن ۇمىتپاي، وعان دا كوڭىل ءبولۋى كەرەك. كۇندىزدەرى ورازا ۇستاعان دا جاقسى. ءبىراق ۇيگە كەلەتىن قوناقتار وزدەرىمەن بىرگە داستارحانعا وتىرىپ، شۇيىركىلەسكىسى كەلۋى مۇمكىن. سوندىقتان پارىز ورازالاردىڭ تىسىندا ءناپىل ورازا ۇستاعان كەزدە ۇيگە قوناق كەلەتىن بولسا، وندا سول كۇنگى ورازانى بۇزىپ، قوناقتارمەن بىرگە وتىرعانى دۇرىس. ونىڭ ۇستىنە ادام كۇنىگە ورازا ۇستايتىن بولسا، السىرەۋى دە مۇمكىن. سوندىقتان پايعامبارىمىز (ساللاللاھۋ ءالايھي ءۋا ءساللام) وسىنى ەسكەرتىپ، «دەنەڭنىڭ دە اقىسى بار» دەگەن.
يسلام قۇقىعىندا ەرلى- زايىپتىلاردىڭ اراسىندا ءبىر جىل بويى جىنىستىق قاتىناس بولماسا جانە ايەل وسى سەبەپتى سوتقا شاعىمدانسا، ايەلدىڭ تىلەگى بويىنشا سوت ولاردىڭ اجىراسۋىنا ۇكىم شىعارادى دەلىنگەن.
ءشامشات ادىلبايەۆا
muslim.kz