16:33, 27 - قىركۇيەك 2017 | GMT +5
قوستانايلىقتاردى قورقىتقان نىساننىڭ نە ەكەنى بەلگىلى بولدى
قوستاناي. قازاقپارات - قوستانايلىقتاردى الاڭداتقان اسپانداعى بەلگىسىز نىسان تۋرالى ق ر قورعانىس جانە اەروعارىش ونەركاسىبى مينيسترلىگىنىڭ باسپا ءسوز قىزمەتى رەسمي حابارلاما جاسادى، دەپ حابارلايدى قازاقپارات ح ا ا ءتىلشىسى.

تۇرعىندار 26- قىركۇيەك كۇنى الەۋمەتتىك جەلىدەگى «تيپيچنىي كوستاناي» پاراقشاسىنا اسپاندا ۇشقان نىساننىڭ سۋرەتىن جاريالادى. وسى كۇنى كەشكە «كاپۋستين يار» پوليگونىنان «توپول» قۇرلىقارالىق بالليستيكالىق زىمىرانىنىڭ سىناق تۇرىندە ۇشىرىلعانى حابارلانعان.
راسىندا دا بۇل قۇبىلىس رەسەيلىك زىمىران ۇشىرىلعان سوڭ پايدا بولىپتى. «بالليستيكالىق زىمىرانداردىڭ ۇشىرىلۋى جونىندە قازاقستاندىقتارعا الدىن الا اقپارات تاراتۋ مۇمكىن ەمەس. بۇل رەسەي فەدەراتسياسى قارۋلى كۇشتەرىنىڭ جەكە قۇزىرىنداعى شارۋا. قانداي دا ءبىر شابۋىل نەمەسە مەملەكەتتىك شەكارا ەرەجەلەرىن بۇزۋ ارەكەتى ەمەس»، - دەلىنگەن ق ر قورعانىس جانە اەروعارىش ونەركاسىبى مينيسترلىگىنىڭ باسپا ءسوز قىزمەتى حابارلاماسىندا.
اۆتور: باتىر جولاي ۇلى