كورەيا ەلشىسى استانالىقتارعا ولەڭ وقىپ بەردى

دەپ حابارلايدى «قازاقپارات» ح ا ا ءتىلشىسى.
«مەن قازاقستاننىڭ استاناسىندا وسىنداي كەرەمەت «دوستىق باقشاسىنىڭ» اشىلعانىنا قۋانىپ تۇرمىن. «ەكسپو-2017» حالىقارالىق كورمەسى ءساتتى اياقتالعان تۇستا ەكى ەلدىڭ ىنتىماعىنىڭ بەكىپ كەلە جاتقانى ودان ارى قۋانتا تۇسەدى. كورەيانىڭ وسىناۋ كەرەمەت باقشاسى قازاق حالقىنا دەگەن قۇرمەت پەن دوستىق نەگىزىندە سالىنىپ وتىر. بيىلعى جىلى 25 جىل تولىپ وتىرعان ەكى جاقتى قارىم- قاتىناس از ۋاقىتقا قاراماستان كۇشەيە ءتۇستى. كورەيالىقتار ءۇشىن قازاقستان ءىرى سەرىكتەستەردىڭ ءبىرى. بۇل ەلدە دە كورەياعا دەگەن قۇرمەتتىڭ زور ەكەنىن بىلەمىز»، - دەيدى كورەيا ەلشىسى.
كيم دە سيكتىڭ ايتۋىنشا، 3 جىل بۇرىن ەكى ەلدىڭ باسشىلارى كەلىسىمگە كەلىپ، اتالعان جوبا 2 جىلدىڭ ىشىندە جۇزەگە اسىرعان.
«ەكسپو كورمەسىنىڭ ارقاسىندا ەكى ەلدىڭ بايلانىسى نىعايا ءتۇستى. كورەيا پاۆيلونى ەڭ تانىمال ورىنداردىڭ ءبىرى بولدى. ءبىز 250-گە جۋىق مادەني شارا وتكىزدىك. سەرىكتەستىكتىڭ الەۋەتى شەكسىز. ءبىز استانا حالقىنا وسى باقشانى تارتۋ ەتەمىز. ەكى ەلدىڭ دوستىعىنىڭ سيمۆولى بولعاندىقتان، باقشاعا باپپەن قاراۋلارىڭىزدى وتىنەمىن. ءوزىم پوەزياعا جاقىن بولعاندىقتان، ءسوزىمدى ولەڭمەن اياقتاۋعا رۇقسات ەتىڭىزدەر»، - دەدى كيم دە سيك.
كورەيا ەلشىسىنىڭ ءوز تىلىندەگى ولەڭى كوپشىلىكتىڭ قوشەمەتىنە يە بولدى. ولەڭ سوزبە- ءسوز اۋدارىلماسا دا، اۋدارماشىنىڭ سوزىنە قۇلاق اسساق ەلشى استانالىقتارعا «دوستىق باقشاسى» ەكى ەلدىڭ دوستىعىن نىعايتادى، ءتورت مەزگىلدە دە وسىندا كەلىپ مەيمان بولىڭىز، تابيعاتتىڭ كوركەم كورىنىسىن باقشاعا كەلىپ تاماشالاڭىز» دەگەن ماندەگى ولەڭدى ارناعان.
ەسكە سالا كەتسەك، بۇگىن استاناداعى «اراي» ساياباعىنىڭ ىشىندە «قازاقستان مەن كورەيا دوستىق باقشاسى» اشىلدى. «كورەيا باقشاسىنىڭ» قۇرىلىسىنا شامامەن 9 اي ۋاقىت كەتكەن. دەمالۋعا ارنالعان ورىندى سالۋ ءۇشىن وڭتۇستىك كورەيادان قۇرىلىس ماتەريالدارى اكەلىنىپ، ساياباققا سول ەلدە وسەتىن اعاشتار وتىرعىزىلعان.
اۆتور: ايان بەكەن ۇلى