دەپۋتات مۇقتاج ازاماتتار ءۇشىن نەسيەنىڭ پايىزىن تومەندەتۋ ماسەلەسىن كوتەردى

استانا. قازاقپارات  - ءماجىلىس دەپۋتاتى مارات بوپازوۆتىڭ پىكىرىنشە، تۇرعىن ءۇي قۇرىلىس جيناق بانكى حالىقتىڭ الەۋمەتتىك ءالجۋاز توبى ءۇشىن نەسيەنىڭ پايىزدىق مولشەرلەمەسىن تومەندەتۋ ماسەلەسىن قاراستىرۋى كەرەك.

بۇل تۋرالى Sputnik قازاقستان جازادى.

«تۇرعىن ءۇي قۇرىلىس جيناق بانكى وسى ۋاقىتقا دەيىن 17 ميلليارد تەڭگە پايدا تاپقان ەكەن. وسىنىڭ ەسەبىنەن حالىقتىڭ الەۋمەتتىك ءالجۋاز توپتارى ءۇشىن نەسيەنىڭ پايىزدىق مولشەرلەمەسىن تومەندەتۋ بانكتىڭ جوسپارىندا بار ما؟ كوپتەگەن ازاماتتىڭ ءۇي الۋعا مۇمكىندىگى جوق. ەگەر نەسيەنىڭ پايىزدىق مولشەرلەمەسى تومەن بولسا، مەنىڭ ويىمشا، بۇل ماسەلەنى 40 پايىزعا شەشەر ەدى. قازىرگى تاڭدا 2,5 ميلليون ادام ءۇي الۋعا كەزەكتە تۇر. بولاشاقتا وسى ماسەلەنى قاراستىرۋعا بولا ما؟»، - دەپ سۇرادى دەپۋتات ماجىلىستە وتكەن وتىرىستا بانك وكىلىنەن.

بانكتىڭ باسقارما ءتوراعاسىنىڭ ورىنباسارى ميراس بەيسەمبايەۆ بۇل ماسەلە قاراستىرىلاتىنىن ايتتى.

«ءبىز تازا تۇسكەن تابىستى قالاي پايدالانۋ قاجەتتىگى بويىنشا اكسيونەرلەرىمىزبەن اقىلداسامىز. ونىڭ ىشىندە الەۋمەتتىك ءالجۋاز توپتارعا نەسيەنىڭ پايىزدىق مولشەرلەمەسىن تومەندەتۋ ماسەلەسى بار»، - دەدى ول.

«وتكەن اپتادا پارلامەنت قابىرعاسىندا اسكەري قىزمەتكەرلەردى ۇيمەن قامتاماسىز ەتۋ ماسەلەسى كوتەرىلدى. سوندا تۇرعىن ءۇي قۇرىلىس جيناق بانكتىڭ ءتورايىمى ءلاززات حانىم 17 ميلليارد تەڭگە تابىسپەن بىتىردىك دەپ ايتتى. سوندا مەن ول كىسىدەن ءال- اۋقاتى تومەن جاستارعا نەسيەنى 5 پايىزبەن ەمەس، ودان دا تومەن پايىزبەن بەرسەك قالاي بولادى دەپ سۇرادىم. بۇگىن دە سول سۇراق قويىلدى. بانك وكىلدەرى قارايمىز دەدى. شەشىلە مە، شەشىلمەي مە - ونى الداعى ۋاقىت كورسەتەدى»، - دەدى دەپۋتات بوپازوۆ ب ا ق وكىلدەرىنە وتىرىستان كەيىن.