قازاقستاندا مەملەكەتتىڭ لاۋازىمدى قىزمەتتەرىنەن ءۇمىتتى ايەلدەر قاراسى كوپ

استانا. قازاقپارات - بۇگىن ق ر مەملەكەتتىك حاتشىسى گۇلشارا ءابدىقالىقوۆانىڭ توراعالىعىمەن پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ كەزەكتى وتىرىسى ءوتتى، دەپ حابارلايدى قازاقپارات.
None
None

«اعىمداعى جىل ەل ەسىندە ەرەكشە قالارى بەلگىلى. ويتكەنى، ەلباسى نۇرسۇلتان نازاربايەۆ ەكونوميكالىق، ساياسي جانە رۋحاني جاڭعىرۋ باعىتتارىندا ۇلكەن رەفورمالاردى باستاپ بەردى. سونىمەن قاتار مەملەكەتىمىزدە ۇلكەن ءىس-شارا - ول ەكسپو-2017 حالىقارالىق مامانداندىرىلعان كورمەسى ءوتتى. بۇل كورمە اياسىندا «ايەلدەر بولاشاق ەنەرگيانى قولدايدى» اتتى ۇلكەن فورۋم بولدى. وعان بارلىق كوميسسيا مۇشەلەرى قاتىستى. سول فورۋمعا قاتىسۋ ءۇشىن 25 ەلدەن 300 دەن استام ايەل كەلدى. شاراعا اتسالىسقان سىزدەرگە العىسىمدى بىلدىرگىم كەلەدى»، - دەدى وتىرىستى اشقان مەملەكەتتىك حاتشى.

سونىمەن قاتار گۇلشارا ءابدىقالىقوۆا ەلىمىزدەگى ايەلدەر قاۋىمىن «رۋحاني جاڭعىرۋ» جالپى ۇلتتىق جوباسىنىڭ 6 باعىتىن ىلگەرىلەتۋ ءۇشىن بارىنشا كۇش جۇمىلدىرۋعا شاقىردى.

وتىرىس بارىسىندا قازاقستان رەسپۋبليكاسىنداعى ب ۇ ۇ- نىڭ 2030-جىلعا دەيىنگى ورنىقتى دامۋ ماقساتتارىنا قول جەتكىزۋ باعىتىندا اتقارىلعان جۇمىستار تۋرالى ق ر سىرتقى ىستەر مينيسترلىگىنىڭ اقپاراتى تىڭدالدى.

سونداي-اق مەملەكەتتىك قىزمەتتى جاڭعىرتۋ جانە مانساپ تۇرعىسىنان ىلگەرىلەتۋ بارىسىندا تەڭ مۇمكىندىكتەردى قامتاماسىز ەتۋ تۋرالى ماسەلە دە قارالدى. مەملەكەتتىك قىزمەت ىستەرى جانە جەمقورلىققا قارسى ءىس-قيمىل اگەنتتىگىنىڭ اقپاراتىنا سايكەس، 2017-جىلدىڭ 1- قاڭتارىنداعى جاعداي بويىنشا ەلىمىزدەگى مەملەكەتتىك قىزمەتكەرلەردىڭ اراسىندا ايەلدەردىڭ ۇلەسى 55,5 پايىزدى قۇراپ، وتكەن جىلعى كورسەتكىشتەن 0,5 پايىزعا ارتقان. جالپى وتكەن جىلى «ب» كورپۋسىنداعى اكىمشىلىك لاۋازىمداردى يەلەنۋگە ارنالعان كونكۋرستارعا 43476 كانديدات قاتىسسا، سونىڭ 20862 ءسىن ايەلدەر قۇراعان. كونكۋرس ناتيجەسىندە تاعايىندالعان قىزمەتكەرلەردىڭ 48,5 پايىزىن ايەلدەر قۇرادى. جيىن سوڭىندا مەملەكەتتىك حاتشى مەملەكەتتىك ورگاندارعا ءبىرقاتار ناقتى تاپسىرما بەردى.

اۆتور: مارلان جيەمباي

سوڭعى جاڭالىقتار