حالىقتى ساقتاندىرۋ جۇيەسى قالاي وزگەرەدى

ق ر ۇلتتىق بانكىنىڭ ءتوراعاسى دانيار اقىشەۆ زاڭنامانىڭ قالاي وزگەرەتىنىن ءتۇسىندىرىپ بەردى، دەپ حابارلايدى قازاقپارات ءتىلشىسى.
«ءبىرىنشى وزگەرىس ول - ونلاين ساقتاندىرۋ جۇيەسىن ەنگىزۋگە قاجەتتى نورماتيۆتىك بازانى ازىرلەۋ. وكىنىشكە قاراي، قازىرگى زاڭناما اتالعان جۇيەنى ەنگىزۋگە جول بەرمەي وتىر. ال ونىڭ ارتىقشىلىقتارى كوپ. جەكە جانە زاڭدى تۇلعالار ساقتاندىرۋ كومپانياسىنىڭ كەڭسەسىنە سابىلىپ جۇرمەيدى. ەندى ءبارىن ۇيالى تەلەفون، يا بولماسا، كومپيۋتەر ارقىلى جاساۋعا بولادى»، - دەدى اقىشەۆ ۇكىمەت وتىرىسىنان كەيىنگى باسپا ءسوز ءماسليحاتىندا.
ونىڭ ايتۋىنشا، ەكىنشى وزگەرىس تۋريستىك قىزمەتتى ساقتاندىرۋعا قاتىستى. وعان سايكەس، شەتەلگە شىعاتىن تۋريستىڭ بارلىق مۇلكى ساقتاندىرۋعا جاتادى. ساپار كەزىندە ناقتى قاۋىپ- قاتەرلەردىڭ ءتىزىمى دە بولادى.
«قازىرگى زاڭناما بويىنشا تۋريست قايتىپ كەلىپ، ءوز قۇقىعىن سوتتا دالەلدەۋى ءتيىس. ال قاۋىپ-قاتەرلەردىڭ ناقتى ءتىزىمى بولسا، ساقتاندىرۋ تولەماقىسىن شەتەلدە ءجۇرىپ، الا بەرۋگە مۇمكىندىك بار»، - دەپ اتاپ كورسەتتى باس بانكير.
بۇدان بولەك، ساقتاندىرۋ ۋاكىلىنىڭ قىزمەتى كەڭەيە تۇسەدى. قازىرگى كەزدە ونىڭ وكىلەتتىلىگى تەك اۆتوساقتاندىرۋعا جارىمدى بولسا، الداعى ۋاقىتتا ساقتاندىرۋدىڭ بارلىق تۇرلەرىنە قولدانىلاتىن بولادى.
ايتا كەتەيىك، بريفينگ كەزىندە باس بانكير تەڭگە باعامىنا قاتىستى ءوز بولجامىن دا جاريالادى. ونىڭ كەزدە ۆاليۋتا ايىرباستاۋ بەكەتتەرىنە جاپپاي جۇگىرىپ، ودان تابىس كورۋدىڭ قاجەتى جوق.