قازىر ۆاليۋتا ساتىپ الىپ جاتقان ازاماتتار شىعىنعا باتادى - ق ر ۇلتتىق بانكى

استانا. قازاقپارات - ۆاليۋتانىڭ ايىرباس باعامىنان پايدا تابۋعا تىرىسۋدىڭ ەش ءمانى جوق. مۇنداي پىكىردى بۇگىن ۇكىمەتتىڭ سەلەكتورلىق رەجىمدەگى وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرگەن ق ر ۇلتتىق بانكى ءتوراعاسى دانيار اقىشەۆ ءبىلدىردى، دەپ حابارلايدى قازاقپارات.

«قازاقستاندا ايىرباس باعاسى ەركىندىككە جىبەرىلگەن. بۇل ونىڭ نەگىزىنەن ۇلتتىق بانكتىڭ قاتىسۋىنسىز قالىپتاساتىندىعىن بىلدىرەدى. ياعني، ول سۇرانىس پەن ۆاليۋتا نارىعىنداعى ۇسىنىسقا وراي قالىپتاسىپ وتىرادى. قازىرگى ۋاقىتتا ورىن الىپ وتىرعان جايت سىرتقى فاكتورلاردى قوسا العاندا بارىنشا جايلى»، - دەدى ول.

وسى رەتتە دانيار اقىشەۆ قازاقستاننىڭ سىرتقى نارىققا شىعاراتىن ەكسپورتتىق ونىمدەرىنىڭ باعاسى كوتەرىلە تۇسكەندىگىن، سوعان وراي ەلگە كەلەتىن ۆاليۋتالىق ءتۇسىم دە ارتاتىندىعىن اتاپ ءوتتى.

«بۇل رەتتە اتالعان ۆاليۋتالىق ءتۇسىمنىڭ قازاقستانعا قانشالىقتى جىلدام جەتەتىندىگىنە جانە شەتەل ۆاليۋتاسىنىڭ قوسىمشا ۇسىنىسىن قامتاماسىز ەتۋىنە بايلانىستى. سونىمەن قاتار، ساۋدا سەرىكتەس ەلدەردەگى احۋالدىڭ جانە ايىرباس باعامىنىڭ دا تۇراقتى ەكەندىگىن كورىپ وتىرمىز. سوندىقتان قانداي دا ءبىر الاڭداۋشىلىققا نەگىز جوق»، - دەدى ول.

سونىمەن قاتار ۇلتتىق بانك ءتوراعاسى ەل ازاماتتارىنا ايىرباس پۋنكتەرىنە جۇگىرىپ، ۆاليۋتا الۋعا جانە سودان پايدا تابۋعا تىرىسۋدىڭ قاجەتى جوق ەكەندىگىن ەسكەرتتى.

«وسى نارىقتا پايدا تاۋىپ قالۋعا تىرىساتىن ازاماتتارعا دا، كاسىپورىندارعا دا تاعى ءبىر مارتە ايتقىم كەلەدى. ءبىز مۇنى بىرنەشە مارتە قايتالادىق تا. ايىرباس باعامى وزگەرگەن كەزدە ايىرباس پۋنكتىنە جۇگىرىپ، سودان پايدا تابۋعا تىرىسۋدىڭ ەش ءمانى جوق. شىعىنعا باتىپ قالۋعا دا بولادى. ويتكەنى، ماكروەكونوميكالىق احۋال جاقسى. ءبىز تەڭگە باعامى ارتىق باعالانىپ وتىر دەپ سانايمىز. ونىڭ نىعايا ءتۇسۋى دە ىقتيمال. سوندىقتان ءقازىر ۆاليۋتا ساتىپ الىپ جاتقان ادامدار ۇتىلاتىن بولادى»، - دەدى دانيار اقىشەۆ.