قازاقستاندا تۇماۋعا قارسى جاپپاي ەگۋ باستالادى
«جىل سايىنعى ءداستۇر بويىنشا يممۋنداۋ كامپانياسى 1 -قازاننان باستالادى. 2017-2018 ەپيدەميا ماۋسىمىنا ارناپ بيۋدجەتتىڭ 1 ميلليارد 200 ميلليون تەڭگە قارجىسىنا رەسەيدە شىعارىلعان «گريپپول» ۆاكسيناسىنىڭ 1454161 دوزاسى الىندى. ونىڭ قۇرامىندا ۆ تۇماۋىنا، A(H3N2) جانە A(H1N1 ) ماۋسىمدىق تۇماۋلارىنا قارسى شتامم انتيگەندەرى بار»، - دەپ مالىمدەيدى ق ر دەنساۋلىق ساقتاۋ مينيسترلىگىنىڭ قوعامدىق دەنساۋلىقتى ساقتاۋ كوميتەتىنىڭ باسپا ءسوز قىزمەتى.
قازىر قازاقستاندا تۇماۋعا قارسى ءۇش ءتۇرلى ۆاكسينا رەسمي تىركەلگەن، ولار: «ۆاكسيگريپ» (فرانسيا)، «ينفليۋۆاك» (نيدەرلاندى) جانە «گريپپول پليۋس» (رەسەي). تۇماۋعا قارسى ەگۋ ءۇشىن وسى ۇشەۋىنىڭ كەز كەلگەن بىرەۋىن قولدانۋعا بولادى.
«مەملەكەتتىك بيۋدجەت ەسەبىنەن حالىقتىڭ سوزىلمالى وكپە، جۇرەك-قان تامىرى اۋرۋلارىمەن اۋىراتىن، يممۋنيتەت جەتىسپەۋشىلىگى بار بالالار، مەديتسينا قىزمەتكەرلەرى، جۇكتى ايەلدەر سياقتى مەيلىنشە ءالسىز توبىنا ءدارى ەگىلەدى»، - دەيدى كەڭسە باسپا ءسوز قىزمەتىندەگىلەر.
بۇدان تىس، جۇمىس بەرۋشىلەردىڭ جانە تۇرعىنداردىڭ جەكە قارجىسىنا دا ۆاكسينا ەگىلەدى. اقىلى ەگۋ ۆاكسيناتسيا ورتالىقتارىندا، ءتيىستى ەمحانالاردا جۇرگىزىلەدى. ولاردىڭ ءدال مەكەنجايى تۋرالى قوعامدىق دەنساۋلىقتى ساقتاۋ وڭىرلىك دەپارتامەنتتەرىنەن اقپارات الۋعا بولادى.
كوميتەتتەگىلەردىڭ ايتۋىنشا، قازاقستاندا تۇماۋ جانە وتكىر رەسپيراتورلىق ۆيرۋستىق جۇقپالى اۋرۋلارعا قارسى ءساتتى ەپيدەميولوگيالىق باقىلاۋ جۇيەسى قالىپتاسقان. سونىمەن قاتار جىلدام شارالار قولدانۋ ماقساتىندا جىل سايىن 1 -قازاننان باستاپ اپتالىق، 1 -جەلتوقساننان باستاپ ايلىق مونيتورينگ جۇرگىزىلەدى.
بۇكىل الەمدىك دەنساۋلىق ساقتاۋ ۇيىمى تۇماۋعا قارسى كۇرەسۋدىڭ ەڭ ءتيىمدى قۇرالى تۇماۋعا قارسى ەگۋ شارالارىن جۇرگىزۋ ەكەندىگىن ايتادى.
