موڭعوليا قازاقتارى قازاقستاننىڭ لاتىن قارپىنە كوشۋ قادامىن قولدادى
قازاقستان حالقى تىلدەرى كۇنى اياسىندا وتكەن شاراعا موڭعولياداعى قازاق دياسپوراسى، مەملەكەتتىك ورگانداردىڭ وكىلدەرى، سونداي- اق شىعارماشىل زيالى قاۋىم جانە بەلسەندى قازاق جاستارى قاتىستى. قازاقستاننىڭ موڭعولياداعى ەلشىسى قالىبەك قوبىلاندين جينالعاندارعا قازاقستان پرەزيدەنتى نۇرسۇلتان نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى اياسىندا جۇرگىزىلىپ وتىرعان رەفورمالار تۋراسىندا اڭگىمەلەدى.
شارا قاتىسۋشىلارى قازاقستانداعى رەفورمالارعا، سونىڭ ىشىندە قازاق ءالفاۆيتىنىڭ لاتىن گرافيكاسىنا وتۋىنە تىلەكتەستىك ءبىلدىردى. موڭعوليا عىلىم اكادەمياسىنىڭ اكادەميگى، دۇنيەءجۇزى قازاقتارى قاۋىمداستىعى القاسىنىڭ مۇشەسى باكەي اعىپار ۇلى قازاق ءالفاۆيتىنىڭ لاتىنعا كوشۋى قازاقستان ءۇشىن ساياسي ماڭىزعا يە ەكەندىگىن تىلگە تيەك ەتتى.
سونىمەن قاتار اكادەميك لاتىن قارپىنە وتەردە قازاق ارىپتەرىنىڭ ءتول ەرەكشەلىكتەرىنە قاتىستى كەيبىر اسپەكتىلەردى ەگجەي- تەگجەيلى زەرتتەۋ قاجەتتىگىن باسا ايتتى.
موڭعوليانىڭ ەڭبەك سىڭىرگەن وقىتۋشىسى بارۋن ارداق جانە «ەل بىرلىگى» قوعامدىق كەڭەسىنىڭ اتقارۋشى ديرەكتورى جەڭىسبەك قايرات لاتىن قارپىنە كوشۋ قازاقستاندىقتارعا ۋاقىت پەن پروگرەسسيۆتى قوعام مۇددەلەرىنىڭ تالاپتارىن ەسكەرە وتىرىپ، ۇلتتىق ەرەكشەلىكتەرىمىزدى ساقتاپ قالۋعا مۇمكىندىك بەرەدى دەگەن ورتاق پىكىر ءبىلدىردى. وسى ورايدا قازاقستاندا مونعوليالىق قازاق مۇعالىمدەرى ءۇشىن جاڭا ءالىپبيدى ۇيرەتۋ كۋرستارىن ۇيىمداستىرۋ ماسەلەلەرى دە قوزعالدى.
