17:50, 25 - قىركۇيەك 2017 | GMT +5
سوتتالۋشىلارعا ارنالعان قازاقستاندىق ەلەكتروندى بىلەزىكتى پايدالانۋ قۇنى قانشا
استانا. قازاقپارات - ق ر ىشكى ىستەر ءمينيسترى قالمۇحانبەت قاسىموۆ بۇگىن ماجىلىستەگى ۇكىمەت ساعاتىنان كەيىن سوتتالۋشىلارعا ارنالعان قازاقستاندا شىعارىلاتىن ەلەكتروندى بىلەزىكتى پايدالانۋ قۇنىن اتادى، دەپ حابارلايدى قازاقپارات.

«ءبىز بىلەزىكتەرگە اقشا شىعىنداعان جوقپىز. ول مەملەكەتتىك- جەكەشەلىك سەرىكتەستىك ەسەبىنەن جاسالادى. قازىرگى ۋاقىتتا ينۆەستور اتالعان بىلەزىكتەردى شىعاراتىن زاۋىت قۇرىلىسىنا قارجىسىن سالۋدا. ءبىز ءبىر جىل بويى اتالعان ءبىر بىلەزىكتى پايدالانعان ءۇشىن شامامەن 34 مىڭ تەڭگە تولەيتىن بولامىز»، - دەدى ول ب ا ق وكىلدەرىنىڭ ساۋالىنا وراي.
سونىمەن قاتار ول ەلەكتروندى بىلەزىكتەردى ەنگىزۋ كەلەسى جىلعا جوسپارلانىپ وتىرعاندىعىن ايتتى.
بۇعان دەيىن حابارلاعانىمىزداي، تالعاردا جازاسىن وتەۋشىلەرگە ارنالعان ەلەكتروندى بىلەزىك شىعاراتىن زاۋىت سالىندى.
اتالعان زاۋىتتىڭ ءونىمى كەلەسى جىلدان باستاپ جازاعا كەسىلگەن 6 مىڭ ادامعا تاعىلادى.
اۆتور: مارلان جيەمباي