زاڭداعى وزگەرىستەر: قازاقستاندا ەنەرگيا ارزاندايدى

 استانا. قازاقپارات - بيىل «ەلەكترەنەرگەتيكا تۋرالى» زاڭعا ءبىرقاتار وزگەرىستەر ەنگىزىلدى. سونىڭ اياسىندا حالىق ءۇشىن ەنەرگيانىڭ باعاسى تومەندەۋى ءتيىس، دەپ حابارلايدى قازاقپارات ءتىلشىسى.

«بىزدە 140 شاعىن كومپانيا ەنەرگيا جەتكىزۋمەن اينالىسادى. ولاردىڭ يەلەگىندەگى ەلەكتر جەلىلەر دە ۇلكەن ەمەس، ۇزاققا سوزىلمايدى. نەگىزى، قۋات كوزدەرىن تۇتىنۋشىعا جەتكىزۋ سالاسىندا وسى ىسپەتتى شاعىن كومپانيالاردىڭ كوپتىگى ەنەرگيانىڭ سوڭعى باعاسىنا قاتتى اسەر ەتەدى دە، سوڭعى باعانىڭ قىمبات بولۋىنا سەبەپ بولادى. قازاقستان ءۇشىن ول - ۇلكەن پروبلەما»، - دەيدى ق ر ۇلتتىق ەكونوميكا مينيسترلىگى تابيعي مونوپوليالاردى رەتتەۋ، باسەكەلەستىكتى جانە تۇتىنۋشىلار قۇقىقتارىن قورعاۋ قورعاۋ كوميتەتىنىڭ ءتوراعاسى ازامات مايتيەۆ استانادا وتكەن كونفەرەنسيا بارىسىندا.

ونىڭ ايتۋىنشا، اتالعان ماسەلەگە بايلانىستى اعىمداعى جىلى ماۋسىم ايىندا «ەلەكترەنەرگەتيكا تۋرالى» زاڭعا وزگەرىستەر ەنگىزىلگەن بولاتىن. اتالعان قۇجات بويىنشا قۋات كوزدەرىن جەتكىزۋگە قاتىستى تالاپتار كۇشەيتىلدى. وسىنىڭ ناتيجەسىدە شاعىن كومپانيالار ءىرى كاسىپورىندارمەن بىرىگەدى دەگەن جوسپار بار. «وسىلايشا، ەنەرگيا جەتكىزۋ تىزبەگى بارىنشا قىسقارۋى قاجەت. شىعىندار ازايادى. دەمەك، حالىق ءۇشىن ەلەكترەنەرگيا ارزانداۋى ءتيىس»، - دەپ اتاپ كورسەتتى مايتيەۆ.

ايتا كەتەيىك، بۇگىن استانادا ەنەرگەتيكانى رەتتەۋ ورگاندارى ايماقتىق قاۋىمداستىعىنىڭ (ە ر ر ا) كەزەكتى كونفەرەنسياسى اشىلدى. سول جەردە ق ر ەنەرگەتيكا مينيسترلىگى كومىردىڭ قىمباتتاۋىنا قاتىستى تۇسىنىك بەردى.

ەلەكترەنەرگەتيكا جانە كومىر ونەركاسىبى دەپارتامەنتى ديرەكتورىنىڭ ورىنباسارى تالعات ءابىلعازى اتوم ەلەكترستانساسىن قۇرىلىسى قانشالىقتى قاجەت ەكەنىن ءتۇسىندىردى.

«قازترانس گاز» كومپانياسى گاز ساقتايتىن قويمالاردىڭ جەتىسپەي جاتقانىن مالىمدەدى.

اۆتور: ارمان اسقاروۆ