15:37, 25 - قىركۇيەك 2017 | GMT +6
نۇرلى جەر : ارىس تۇرعىندارى ءۇشىن كوپقاباتتى ءۇي سالىنۋدا
شىمكەنت. قازاقپارات - ق ر پارلامەنتى ءماجىلىسىنىڭ دەپۋتاتى ەرجان قۇدايبەرگەن جۇمىس ساپارىمەن وڭتۇستىك قازاقستان وبلىسىندا بولىپ، ارىس قالاسىنىڭ تۇرعىندارىمەن كەزدەستى. جەرگىلىكتى حالىققا ماجىلىستە قارالىپ جاتقان زاڭدار مەن اتقارىلىپ جاتقان جۇمىستار تۋرالى بايانداپ بەردى، دەپ حابارلايدى قازاقپارات ح ا ا ءتىلشىسى.
ءماجىلىس دەپۋتاتى ساپار بارىسىندا اقدالا اۋىلدىق وكرۋگىنىڭ تۇرعىندارىمەن كەزدەسىپ، حالىقتىڭ وتىنىشتەرىن تىڭدادى. كەزدەسۋ اياسىندا اقدالا اۋىلىنىڭ تۇرعىنى زەينەتكەر، اۋىل ءبيى ءابىلدا اياپوۆ ءوزىن تولعاندىرىپ جۇرگەن سۇراقتارىن قويىپ، تۇشىمدى جاۋاپتارىن الدى. دەپۋتات سونداي- اق ەلباسى ن. ءا. نازاربايەۆتىڭ «نۇرلى جەر» باعدارلاماسى اياسىندا ارىس قالاسىندا بوي كوتەرىپ جاتقان ءۇش قاباتتى 108 پاتەرلى ءۇيدىڭ قۇرىلىسىن ارالاپ كوردى. ونداعى اتقارىلىپ جاتقان جۇمىستاردىڭ ساپالى جۇرگىزىلۋىن جانە ۋاقىتىلى حالىقتىڭ يگىلىگىنە بەرىلۋىن قاداعالاۋدى تاپسىردى. حالىق قالاۋلىسى توعىز جولدىڭ تورابىندا ورنالاسقان شاعىن قالادا اتقارىلىپ جاتقان اۋقىمدى جۇمىستارعا وڭ باعاسىن بەردى.
اۆتور: اينۇر اقبايەۆا
