قازاقستان جەكەمەنشىك تۇرمە قۇرىلىسىنان نەگە باس تارتتى؟
«مويىنداۋ كەرەك، ءبىزدىڭ قىلمىستىق-اتقارۋ جۇيەمىز ءالى كۇنگە دەيىن كوبىنەسە بۇرىنعى كەڭەستىك جۇيەنىڭ بەلگىلەرىن ساقتاپ كەلەدى جانە حالىقارالىق ستاندارتتاردان الىستاۋ. سوندىقتان دا ەلىمىزدە قىلمىستىق-اتقارۋ ساياساتى مەن جازانى ورىنداۋدى ۇيىمداستىرۋ تەتىكتەرى جەتىلدىرۋدە. حالىقارالىق تاجىريبەنى ەسكەرە وتىرىپ، قىلمىستىق-اتقارۋ جۇيەسىن دامىتۋدىڭ نەگىزگى تۇجىرىمدامالىق باعىتى ازىرلەندى. ءبىرىنشى كەزەكتە باس بوستاندىعىنان ايىرىلعانداردى قاماۋدا ۇستاۋدىڭ ۇجىمدىق تارتىبىنەن جەكە كامەراعا ورنالاستىرۋعا اۋىسۋ ەسكەرىلگەن. ول ءۇشىن قازىرگى زامانعى جاڭا مەكەمەلەردى سالۋ كەرەك. ارينە، بۇل وڭاي شارۋا ەمەس، سەبەبى وسى جۇيەنىڭ 10 جىل بويى ادىلەت مينيسترلىگىنىڭ قاراۋىندا بولعان كەزىندە بىردە-ءبىر كولونيا مەن تەرگەۋ يزولياتورى سالىنباعان»، - دەدى مينيستر پارلامەنت ماجىلىسىندە باس بوستاندىعىنان ايىرۋ ورىندارىنان بوساتىلعان جانە پروباتسيا قىزمەتىندە ەسەپتە تۇرعان ازاماتتاردى الەۋمەتتىك وڭالتۋدىڭ 2017-2019-جىلدارعا ارنالعان كەشەندى ستراتەگياسىن ىسكە اسىرۋ تاقىرىبىنداعى ۇكىمەت ساعاتىندا.
سونىمەن قاتار ۆەدومستۆو باسشىسى قازاقستاندا جەكەمەنشىك تۇرمەلەردىڭ قۇرىلىسى يدەياسىنان نەلىكتەن باس تارتىلعاندىعىن ايتتى.
«مەملەكەتتىك-جەكەشەلىك سەرىكتەستىك تەتىگىن پايدالانۋ ارقىلى جاڭا كولونيانى سالۋ نۇسقاسىن ۇلتتىق ەكونوميكا مينيسترلىگىمەن بىرلەسە قاراستىردىق. الايدا جوبا كونتسەسسيا كەستەسى بويىنشا جەكە كاپيتالدىڭ قاتىسۋى جاعدايىندا ساراپتامادان وتە المادى، ويتكەنى بۇل جوبا ايتارلىقتاي قىمباتقا ءتۇسىپ، ەل بيۋجەتىنە اۋىرتپالىق تۇسىرەتىنى انىقتالدى»، - دەپ ءتۇسىندىردى مينيستر.
ق. قاسىموۆتىڭ ايتۋىنشا، قازىرگى كەزدە ۇلتتىق ەكونوميكا مينيسترلىگىمەن جانە قازاقستاننىڭ مەملەكەتتىك-جەكەشەلىك سەرىكتەستىك ورتالىعىمەن بىرلەسە قولدانىستاعى تۇزەتۋ مەكەمەلەرىنىڭ اۋماعىنداعى تۇرعىن كورپۋستارىن قايتا قۇرۋ نەمەسە بالامالى نەگىزدە ولاردىڭ ورنىنا جەكە كامەرالى جاڭا كورپۋستاردى سالۋ قاراستىرىلۋدا. بۇل ۇسىنىستار ۇكىمەت تاراپىنان قولداۋعا يە بولدى.
اۆتور: رۋسلان عابباسوۆ
