بوستاندىققا شىققانداردىڭ ۇشتەن ءبىرى قايتا قىلمىس جاسايدى - قاسىموۆ
بۇل تۋرالى بۇگىن پارلامەنت ماجىلىسىندەگى ۇكىمەت ساعاتىندا ق ر ىشكى ىستەر ءمينيسترى قالمۇحانبەت قاسىموۆ ءمالىم ەتتى، دەپ حابارلايدى قازاقپارات.
«پەنيتەتسيارلىق پروباتسياعا توقتالاتىن بولساق، وعان جازانى وتەۋ مەرزىمى اياقتالۋىنا ءبىر جىل ۋاقىتى قالعان سوتتالعاندار جاتادى. مەكەمەنىڭ اكىمشىلىگى الەۋمەتتىك-قۇقىقتىق كومەك كورسەتۋ بويىنشا ارنايى جەكە باعدارلامانى قۇرادى، ناقتى سوتتالعان اداممەن ءتيىستى جۇمىستى باستايدى، بوساتىلۋعا دايىندالادى. وسى ورايدا تاربيەلىك شارالار جۇرگىزىلىپ، قۇقىقتارى مەن مىندەتتەمەلەرى تۇسىندىرىلەدى. سونىمەن قاتار تۋىستىق جانە الەۋمەتتىك بايلانىستارىن قالپىنا كەلتىرۋ، الەۋمەتتىك قىزمەتتەر الۋ قاجەتتىلىگى تۋرالى نيەتى قارالادى»، - دەدى مينيستر.
ونىڭ ايتۋىنشا، بۇل تۇرعىدا قامتىلعان ماسەلەلەردىڭ بارلىعى الدىن الا بەكىتىلگەن تارتىپتە اكىمدىكتەرگە، پوليتسياعا جانە پروباتسيا قىزمەتىنە حابارلانادى.
وسى باعىتتا شارالار وتە ماڭىزدى ەكەنىنە توقتالعان قاسىموۆ: «جىل سايىن ەلىمىزدە كولونيالاردان 10 مىڭنان استام ازامات بوساتىلادى. ولاردىڭ ۇشتەن بىرىنە جۋىعى بوستاندىققا شىققاننان كەيىن قايتا قىلمىس جاسايدى»، - دەدى.
ۆەدومستۆو باسشىنىڭ سوزىنە قاراعاندا، كولونيالاردا سوتتالعانداردىڭ جالپى ورتا جانە كاسىبي ءبىلىم الۋلارى ءۇشىن بارلىق قاجەتتى جاعدايلار جاسالعان. مەكەمەلەردە 53 جالپى ءبىلىم بەرەتىن مەكتەپ جۇمىس ىستەۋدى. 47 كاسىبي كوللەدجدىڭ بازاسىندا 35 جۇمىس ماماندىقتارى بويىنشا وقىتۋ جۇرگىزىلەدى.
اۆتور: رۋسلان عابباسوۆ
