دۇنيەجۇزىلىك بوديبيلديڭ فەدەراتسياسىنىڭ باسشىسى سينگاپۋردا وتكەن تاي بوكسىنان جەكپە- جەكتە كوز جۇمدى - كەسكىن
ۇيىمداستىرۋشىلاردىڭ مالىمەتىنشە، دۇنيەجۇزىلىك بوديبيلديڭ فەدەراتسياسىنىڭ پرەزيدەنتى پراديپ سۋبرامانيان جەكپە-جەك كەزىندە العان جاراقاتىنان جەرگىلىكتى اۋرۋحانالاردىڭ بىرىندە كوز جۇمعان.
بەلگىلىسى، ايقاس تورەشى شەشىمىمەن 32 جاستاعى سۋبرامانياننىڭ تەحنيكالىق نوكاۋتىنا بايلانىستى توقتاتىلعان. ونىڭ كومانداسىنىڭ مۇشەلەرىنىڭ ايتۋىنشا، سپورتشىنىڭ جاعدايى اسا اۋىر بولماعان. جەكپە-جەكتەن سوڭ سپورتشى دەرەۋ اۋرۋحاناعا جەتكىزىلگەن، ءبىر ساعاتتان كەيىن ول قايتىس بولعان.
ايقاس سينگاپۋرداعى ەليتالىق مەكەمەنىڭ ءبىرى - بەس جۇلدىزدى «مارينا بەي سەندس» قوناق ۇيىندە وتكىزىلگەن. باستاپقىدا قارسىلاستار رەتىندە 41 جاستاعى بلوگەر ستيۆەن ليم مەن تانىمال سينگاپۋرلىق ءانشى سيلۆەستەر سيم بەلگىلەنگەن. الايدا ەكى كۇن قالعاندا ءانشى ساقتاندىرۋ كومپانياسىمەن كەلىسە الماعاندىقتان ايقاستان باس تارتقان. وسى كەزدە سۋبرامانيان شارشى الاڭعا شىعۋعا ءوزىن ۇسىنعان.
مارقۇمنىڭ تۋىستارىنىڭ ايتۋىنشا، سپورتشى بوديبيلديڭ جانە پاۋەرليفتينگىمەن كاسىبي تۇرعىدا اينالىسقان، كەيىنگى ءۇش ايدا جاۋىنگەرلىك ونەرگە قىزىعۋشىلىق تانىتقان. ونىڭ قارسىلاسى دا كاسىبي ايقاسشى ەمەس. سونداي-اق، جەكپە-جەكتە تاي بوكسىنىڭ جەڭىلدەتىلگەن ەرەجەسى بويىنشا وتكىزىلگەن.
