ءجۇرسىن ەرمان باياناۋىل اۋدانىنىڭ قۇرمەتتى ازاماتى اتاندى
پاۆلودار وبلىسىنىڭ باياناۋىل اۋدانىندا جۇمات شانيننىڭ 125 جىلدىعىنا ارنالعان رەسپۋبليكالىق اقىندار ايتىسى ءوتتى. ايتىس شىمىلدىعىن اۋدان اكىمى ورازگەلدى قايىرگەلدينوۆ اشىپ، قازاق ك س ر- ءنىڭ حالىق ءارتىسى، قازاق تەاترىنىڭ نەگىزىن سالۋشى جۇمات تۇرعىنباي ۇلى شانيننىڭ مەرەيتويىمەن قۇتتىقتادى. سونىمەن قاتار، اۋدان باسشىسى اقىن ءجۇرسىن ەرمانعا «باياناۋىل اۋدانىنىڭ قۇرمەتتى ازاماتى» توسبەلگىسىن سالتاناتتى تۇردە تابىس ەتتى. سونداي-اق، ءدال وسىنداي اتاق قازاقستاننىڭ ەڭبەك ەرى، قازاقستاننىڭ حالىق ءارتىسى اسانالى اشىموۆكە جانە وسى اۋداننىڭ الەۋمەتتىك-ەكونوميكالىق، اۋىل شارۋاشىلىعى جانە ءبىلىم بەرۋ سالاسىنىڭ دامۋىنا ەلەۋلى ۇلەس قوسىپ جۇرگەن ءبىرقاتار ازاماتتارعا بەرىلدى.
ايتىسقا قازاقستاننىڭ تۇكپىر-تۇكپىرىنەن كەلگەن 16 اقىن قاتىستى. اتاپ ايتار بولساق، ارقالىقتان ايبەك قاليەۆ، الماتىدان رۇستەم قايىرتاي ۇلى مەن شۇعايىپ سەزىمحان، استانادان ەركەبۇلان قاينازار مەن اسەم ەرەجە قىزى، قاراعاندىدان ماقسات اقانوۆ پەن ديدار قاميەۆ، قىزىلوداردان مەيىربەك سۇلتانحان، شىمكەنتتەن قاليجان ءبىلداش پەن داۋرەن اقساقالوۆ، پاۆلودار وبلىسىنان اسپانبەك شۇعاتايەۆ، قۋانىشبەك شارمانوۆ، نۇرقانات قايرات، وڭعار قابدەنوۆ، تىلەك سەيىتوۆ، مارەس بايرون كەلدى.
ايتىستىڭ قورىتىندىسى بويىنشا جۇمات شانين اتىنداعى ارنايى جۇلدەگە ارقالىقتان كەلگەن ارقالى اقىن ايبەك قاليەۆ لايىق دەپ تانىلدى. ال، ءۇشىنشى ورىن ەكى اقىنعا بەرىلدى. ولار - قاراعاندىلىق ديدار قاميەۆ پەن استانالىق ەركەبۇلان قاينازار.
استانادان كەلگەن اسەم ەرەجە قىزىنا ەكىنشى جۇلدە بۇيىردى. ال، باياناۋىل اۋدانىنىڭ نامىسىن قورعاعان اسپانبەك شۇعاتايەۆقا ءبىرىنشى ورىن بۇيىرسا، ايتىستىڭ باس جۇلدەسىن جانە 1,5 ميلليون اقشالاي سىيلىقتى قاراعاندى وبلىسىنان كەلگەن ماقسات اقانوۆ جەڭىپ الدى.
