ۇشقىش بولۋدى ارمانداعان جىگىتتەر اۋە قورعانىسى كۇشتەرىنىڭ قاتارىن تولىقتىردى - فوتو

اقتوبە. قازاقپارات - اقتوبەدەگى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىن بىتىرگەن تۇلەكتەر ەلىمىزدەگى اسكەري قىزمەتكەرلەردىڭ قاتارىن تولىقتىردى، دەپ حابارلايدى قازاقپارات ءتىلشىسى.

  اقتوبەدەگى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىن 93 تۇلەك ءبىتىردى. ولاردىڭ ءبارى 4 جىلدان استام ۋاقىت بويى ءبىلىم الىپ، تاجىريبە جينادى. الداعى ۋاقىتتا بارلىعى ەلىمىزدىڭ اۋە قورعانىسى كۇشتەرىنىڭ قاتارىن تولىقتارادى. تۇلەكتەر 10 جىلعا كەلىسىمشارت جاساپ قويعان. ۇزدىك ديپلوم العان ۇشقىشتىڭ ءبىرى اقتوبەگە تالدىقورعاننان كەلگەن.

«وقۋ جوسپارىنا ساي 3 كۋرستى بىتىرگەن سوڭ العاش رەت اۋەگە كوتەرىلدىك. ەلىمىزدە ۇشاق تۇرلەرى وتە كوپ. ينستيتۋتتا ل-39 ۇشاعىمەن تاجىريبە جيناپ، ەندى سۋ-30 ۇشاعىنا وتىرامىز. مەن جۇمىس ىستەۋگە تالدىقورعان قالاسىنا بارامىن. اقتوبەگە كەلىپ، وقۋ ورنىنا تۇسكەن كەزدەن باستاپ ءبىز ۇشقىشتار بولىپ سانالامىز. ۇشقىشتار ءومىر بويى وقيدى، تاجىريبە جينايدى. ارينە، اۋەگە كوتەرىلگەندە وقىس جاعدايلار بولادى. تەحنيكانىڭ اتى تەحنيكا. كەيدە بۇزىلادى. ءبارىن جەڭۋ ناعىز ماماننىڭ قولىنان كەلەتىن ءىس. كەز كەلگەن ادام ۇشقىش بولا المايدى. ول راس. ەڭ ءبىرىنشى كۇننەن باستاپ كوپتەگەن تەست، مەديتسينالىق، پسيحولوگيالىق تەكسەرۋدەن ءوتىپ ءجۇرمىز. بۇل جالعاسادى. ءبىز قىزمەتتەن كەتكەنشە ۇنەمى تەكسەرىلەمىز»، - دەدى تۇلەك ميراس ايدار ۇلى.

ول بالا كەزدەن ۇشقىش بولۋدى ارمانداعان. بۇل ارمان اتا- اناسىنىڭ ەستەلىكتەرىندە ءجيى ايتىلدى. «كىشكەنتاي كەزدە اسپاندا ۇشىپ بارا جاتقان ۇشاقتى كورىپ، قولىمدى جوعارى كوتەرىپ، سوڭىنان جۇگىرىپ جۇرگەنمىن. مۇنى مەن ەسەيگەن سوڭ ءبىلدىم. مەكتەپ تابالدىرىعىن اتتاپ، 1- سىنىپقا بارعاننان باستاپ ۇشقىش بولامىن دەپ ارمانداپ، سوعان قول جەتكىزدىم. بۇل وقۋ ورنى اقتوبەدە ەكەنىن بىلگەن جوقپىن، ءبىراق قايدا بولسا دا بارامىن دەدىم. وقۋ ورنىنا تۇسپەي تۇرىپ ۇشاقتاردىڭ كەسكىندەمەسىن جيناپ ءجۇردىم. ال ينستيتۋتقا كەلگەن سوڭ ءبارىمىز اعاشتان ۇشاق جاسادىق، سونى ساقتايمىز. بۇل ءبىزدىڭ بويتۇمارىمىز» ، - دەدى جاس مامان.

 ال راديوينجەنەر ماماندىعىن يگەرگەن ءازيز دانتايەۆ الداعى 10 جىلدا ق ر ۇلتتىق قاۋىپسىزدىك كوميتەتىنىڭ شەكارا قىزمەتىندە ەڭبەك ەتەدى.

«الماتى قالاسىنان اقتوبەگە كەلىپ، ءبىلىم الدىم. اكەم مەن اعام اسكەري سالادا ەڭبەك ەتەدى. مەن الدىڭعى تولقىننىڭ جولىمەن راديوتەحنيكا سالاسىن تاڭدادىم. جەر مەن كوكتىڭ اراسىن بايلانىستىرىپ وتىرامىن، امان- ەسەن ۇشىپ، قونۋىنا جاۋاپ بەرەمىن. ەگەر اقاۋلار بولسا، جوندەيمىن. وتاندى قورعاۋ ءاربىر ازاماتتىڭ قاسيەتتى بورىشى»، - دەدى ءازيز دانتايەۆ. ينجەنەردىڭ ارمانى گەنەرال شەنىن الۋ، ول بۇگىن لەيتەنانت بولىپ، وقۋ ءبىتىردى.

ەسكە سالساق، ت. بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى 2016 -جىلى جاڭا ماماندىقتى قوستى. قازىر مۇندا اسكەري دارىگەرلەر دايىندالادى.

اۆتور: التىناي ساعىندىقوۆا